Prezeidente PN, Aniceto Longuinhos Guteres Lopez. Imajen TATOLI /Egas Cristóvão.

DILI, 10 fevereiru 2021 (TATOLI)—Prezidente Parlamentu Nasionál (PPN), Aniceto Longuinhos Guterres Lopes, husu ba membru Conselho de Imprensa atu hatudu integridade, profisionalizmu, independente no imparsiál bainhira hala’o knaar hanesan órgaun supervizaun ba meiu komunikasaun sosiál sira iha Timor-Leste.

 Notísia Relevante: Virgílio Guterres re-eleitu sai Prezidente Conselho de Imprensa

“Ha’u husu ba membru Conselho de Imprensa Timor-Leste ne’ebé ohin simu pose atu hatudu integriadade, profisionalizmu, independente no imparsiál bainhira hala’o knar nu’udar orgaun supervizaun ba meiu komunikasaun sosiál sira iha Timor-Leste. Conselho de Imprensa nu’udar órgaun importante ida iha mundu komunikasaun, liuliu iha komunikasaun sosiál ne’ebé indispensavél ba vida umana no vida sosiál iha konstrusaun no rekonstrusaun Timor-Leste nu’udar Estadu Direitu Demokrátiku,” PPN Aniceto Longuinhos Guterres Lopes hateten iha ninia diskursu iha serimónia tomada de pose ba membru Conselho de Imprensa iha Parlamentu Nasionál, kuarta ne’e.

Aniceto Guterres hatutan, Conselho de Imprensa (CI) moris iha kompleksidade ida no aumenta tan ho dinamika vida sosiál polítika, ekonomika, progresu teknolojia informatika ne’ebé la’o lalais tebés, mak CI halo nia funsaun no halo supervizaun ba órgaun komunikasaun sosiál sira no ba jornalista sira-ne’ebé eiziste no halo sira-nia atividade jornalistiku iha Timor-Leste.

PPN husu ba kuadru polítiku no legál sira rekere CI hala’o nia funsaun sira ho karáter rigorozu, transparante, independente, imparsiál, profisionál, integridade etika, no ho igualdade.

Nia hateten, CI mós sai fatin ida ba sidadaun sira atu hato’o sira-nia preokupasaun kona-ba órgaun komunikasaun sosiál sira, kona-bá jornalista sira tanba públiku nia espetativa tula mós ba membru CI iha prosesu konstrusaun no rekonstrusaun sosiedade Timor-Leste ne’ebé kompleksu.

Prezidente Parlamentu Nasionál, Aniceto Guterres, hasai retratu hamutuk ho membru Conselho de Imprensa, iha salaun PN, kuarta (10/02). Imajen TATOLI/Egas Cristovão.

“Membru CI hala’o misaun todan ida maibé la’ós misaun imposivel bainhira bagajen profísionál, morál, teknika no administrative ne’ebé ida-idak iha, tau hamutuk liuhosi  kolaborasaun,  komunikasaun no  konsertasaun regulár entre membru no pesoál apoiu sira hodi hatudu kompeténsia hosi órgaun supervizora ida-ne’e,” nia dehan.

Iha sosiedade Timor-Leste pluralistika no multidimensionál ne’ebé nakloke ba mudansa, nia hateten, iha ejizensia kona-ba liberdade hato’o no hetan informasaun, liberdade imprensa no iha mós ejizensia kona-ba komunikasaun responsavel, komunikativu no edukativu, komunikasaun ba paz no estabilidade, ba koezaun no inklusaun sosiál no mídia.

“Komunikasaun sira-ne’e, kontribui ba konsolidasaun Estadu Direitu Demokrátiku no dezenvolvimentu sustentavél ba sidadaun hotu-hotu iha Timor-Leste. Liberdade nu’udar pre-kondisaun indispensavel iha komunikasaun sosiál maibé dala barak ema ‘kondenadu’ tanba liberdade ida-ne’e,” nia fó hanoin.

Tanba ne’e, nia husu ba membru Conselho de Imprensa atu presiza iha norma reguladora hodi halo ekilibriu ba ejizensia hirak-ne’e no mantein nafatin profisionalizmu, padraun étika ne’ebé aas. Iha situasaun hanesan ne’e, ho ejizensia kona-bá profisionalizmu no kodigu etika jornalista sira, urjente atu estabelese Institutu Formasaun Jornalista hodi kria kondisaun ba jornalista no jerente meiu komunikasaun sosiál hetan formasaun.

Membru Conselhu de Imprensa sira-ne’ebé mak ohin simu pose iha Parlamentu Nasionál ba periódu 2021-2025 ne’e mak hanesan; Virgilio da Silva Guterres (Prezidente KI), Otelio Ote, Expedito Dias Ximenes, Francisco B.S da Costa, no Benevides Coreia Barros.

Notísia Relevante: Komisaun A konsidera jornalista na’in-32 ajuda deskobre prosesu eleisaun latuir lei

Jornalista: Osória Marques

 Editór: Cancio Ximenes

HAKEREK NO HATÁN

Please enter your comment!
Please enter your name here