Prezidente Conselho de Imprensa, Virgilio Guterres. Imajen/Dokumentasaun Tatoli.

DILI, 25 dezembru 2021 (TATOLI)—Diretór Ezekutivu Conselho de Imprensa, Rigoberto Monteiro, hateten Virgílio da Silva Guterres re-releitu sai Prezidente Conselho da Imprensa (CI) ba periódu 2021-2025 liuhosi akta reuniaun eleisaun Prezidente CI nian ne’ebé hala’o iha salaun plenária Conselho de Imprensa, Quintál-Boot, Dili.

Notísia Relevante: Expedito Dias Ximenes-Benevides Correia reprezenta PN ba CI

Nia hatutan, membru Conselho de Imprensa ne’ebé konkore ba eleisaun ne’e mak Expedito Dias Ximenes no Virgílio da Silva Guterres ne’ebé to’o ikus mai Virgílio da Silva Guterres re-eleitu sai Prezidente Conselho de Imprensa ba periódu tinan haat.

“Bainhira iha eleisaun hotu ne’ebé la’o iha ambiente ne’ebé ho demokrátiku, iha apuramentu rezultadu finál pronunsia katak Virgílio da Silva Guterres re-eleitu sai Prezidente Conselho de Imprensa ho mandatu tinan lima ho votu tolu (3) no Expedito Dias Ximenes ho votu rua (2),” Diretór Ezekutivu Conselho de Imprensa, Rigoberto Monteiro, hateten ba jornalista sira liuhosi konferénsia imprensa, segunda ne’’e.

Eleisaun Prezidente CI ne’ebé hala’o, nia dehan, bazea ba dekretu-lei númeru 25/2015, loron 5 agostu ne’e marka prezensa hosi membru Konselho de Imprensa sira hanesan Benevides Correia Barros, Expedito Dias Ximenes, Francisco Belo Simões da Costa, Otélio Ote, no Virgílio da Silva Gutteres.

Entretantu, Prezidente Eleitu, Virgílio da Silva Guterres hateten, nia apresia ba konfiansa hosi membru Conselho de Imprensa sira-ne’ebé hili nia atu kontinua hanesan Prezidente Conselho de Imprensa ba termu foun ninian iha tinan haat ne’ebé mai.

“Ha’u hanoin prosesu ne’ebé la’o iha Conselho de Imprensa simples hodi envolve ema na’in-lima (5). Ne’ebé, bele dehan limanfuan lima ne’e, bainhira komu hamutuk, iha forsa no enerjia atu bele halo buat ruma,” Virgílio da Silva Guterres hateten.

Prosesu simples ida-ne’e, nia hateten, refleta mós natureza CI ninian katak CI moris atu defende duni liberdade opiniaun no espresaun ne’ebé sidadaun sira halo no liberdade sira-ne’ebé orsida imprensa sira mak sei sai espasu hodi hato’o diverzénsia sira-ne’e.

“Ne’e onra no previlejiu boot ida hodi kontinua konfiansa ida-ne’e. Eskollidu hodi kontinua mandatu ida-ne’e, la’ós pozisaun ida polítika liu hodi ema bele komprende hanesan oportunidade hodi halo buat seluk. Maibé, ne’e oportunidade ida  hodi serbi di’ak liután liuliu elementu importante iha konstituisaun; demokrasia, liberdade imprensa no liberdade espresaun. Ida ne’e aspetu xave ida,” nia hateten.

Aleinde ida-ne’e, nia esplika, akta nu’udar konkluzaun hosi prosesu eleisaun ida no akta ida-ne’e sei aneksadu nu’udar dokumentu hodi entrega ba Parlamentu Nasionál hodi kontinua nia prosedimentu tuirmai; primeiru mak publika iha Jornál Repúblika, depois kalendariza, tuirmai ba prosesu tomada pose husi Parlamentu Nasionál.

Iha loron lima tuir mai Conselho de Imprensa sei haruka Akta Eleisaun nian ba Parlmemtu Nasionál (PN) no hafoin PN haruka ona ba Jornál da Repúbblika iha loron 10 nia laran, Prezidente Parlamentu Nacionál sei fó pose ba Prezidenti CI eleitu, Virgílio da Silva Guterres, no membru CI sira hanesan Benevides Correia Barros, Expedito Dias Ximenes, Francisco Belo Simões da Costa no Otélio Ote. 

Tuir lei Komunikasaun Sosiál, Kapítulu VII kona-ba “Conselho de Imprensa” iha artigu 45 kona-ba Kompozisaun hateten Konsellu Imprensa hamutuk membru na’in-lima, ne’ebé atu hili liuhosi dalan tuirmai: a) Reprezentante jornalista na’in-rua ne’ebé sira hili tiha ona liuhosi eleisaun; b) Reprezentante órgaun komunikasaun sosiál ida, ne’ebé órgaun sira hili tiha ona liuhosi eleisaun; c) Sidadaun na’in-rua ne’ebé ho kapasidade be ema hotu hatene no iha méritu profisionál ho preferénsia ne’ebé hatutan ba komunikasaun sosiál, hosi sira na’in-rua ida nu’udar jurista, ne’ebé Parlamentu Nasionál hili; d) Membru sira Konsellu Imprensa hili entre sira ninia Prezidente.

Iha artigu 45 hateten, mandatu membru Konsellu Imprensa ba tinan haat (4) bele hafoun dala ida de’it, no iha artigu 47 kona-ba ”Estatutu membru sira-nian” haktuir bainhira membru Konsellu Imprensa hala’o knaar sei tau-hamutuk ho ezersísiu atividade profisionál ne’ebé hanesan, sei la selu nein fó subsídiu osan no la iha karatér permanente, no membru sira Konsellu Imprensa iha direitu ba seña prezensa tuir termu ne’ebé ninia estatutu sei estabelese karik.

Jornalista: Evaristo Soares Martins 

Editór: Cancio Ximenes

HAKEREK NO HATÁN

Please enter your comment!
Please enter your name here