Koordenadora Jerál Komisaun Nasionál COVID-19, Ministériu Saúde, Odete da Silva Viegas. Imajen/Felicidade Ximenes.

DILI, 09 fevereiru 2021 (TATOLI)—Ministériu Saúde (MS) rejista tan sidadaun estranjeiru na’in neen pozitivu COVID-19 ne’ebé aumenta númeru baixa iha Sentru Izolamentu hamutuk na’in 29.

“Ohin komisaun nasionál rejista tan sidadaun estranjeiru na’in neen konfirmadu pozitivu COVID-19 ne’ebé asimtomátiku,’’ Koordenadora Jerál Komisaun Nasionál Prevensaun COVID-19, Odete da Silva Viegas fó sai liuhosi konferénsia imprensa iha salaun Ministériu Saúde, Caicoli, tersa (09/02).

Notísia Relevante:Kazu pozitivu COVID-19 aumenta ba 27

Pasiente na’in neen ne’e, kompostu hosi feto na’in-haat ho idade 61, 45, no na’in rua ho idade hanesan 34. Alende ne’e, iha mane na’in-rua,  ida  ho idade 53 no ida seluk labarik tinan tolu.

Odete esplika, hosi na’in neen ne’e, na’in lima nu’udár família ida, iha loron 28 janeiru 2021 sira halo viajen hosi Jakarta, Indonézia mai Kupang ho Garuda Airlines, no iha loron 29 sira kontinua viajen mai Atambua.

Iha loron 30 janeiru, sira tama Timor-Leste liuhosi pontu entrada Batugade no to’o iha Dili sira submete ba auto-kuarentena iha White Sand Metiaut.

Alende ne’e, sidadaun ida seluk, feto ho idade 34 ne’ebé  halo viajen  hosi Betun ba Atambua, depois hosi Atambua mai Timor-Leste iha loron 28 janeiru  tama ilegal liu hosi fronteira Batugade, no hosi Batugade mai Dili ho motorizada (ojec) ba direta família iha Beto, Comoro.  

Bainhira to’o iha Beto, Odete dehan, familia sira husik ema ne’e hela de’it iha liur hodi kontaktu kedan ekipa vizilánsia no lori ba integra hamutuk ho pasajeiru na’in 23 iha fatin kuarentena Tibar.

“Agora sidadaun ne’ebé mak lori ojec tula sidadaun ilegál ne’e, ita-nia ekipa vizilánsia halo hela investigasaun atu buka tuir ninia paradeiru,’’ nia hateten.

Sidadaun estranjeiru na’in neen ne’e, teste swab foti iha loron 8 fevereiru no rezultadu pozitivu COVID-19 relata ba públiku iha loron 9 fevereiru 2021.

Dadus ba loron  9 fevereiru 2021 komulativu teste 19.691, hein rezultadu 115, kazu Foun 6, komulativu kazu 86, rekoperadu laiha,  komulativu rekoperadu  57+4 = 61, atuál baixa 29 Vera Cruz  28, RAEOA  ida.

Komulativu negativu   19.496, totál kuarentena 288, Dili 170, munisípiu 118, auto-kuarentena 123, Dili 97, munisípiu 26, pasa ona loron 14 na’in 7.732.

Notísia Relevante:Pasiente COVID-19 na’in-haat fila bá família

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here