Koordenadora Pilár III COVID-19, Josefina Clarinha João. Imajen Tatoli/António Gonçalves.

DILI, 04 fevereiru 2021 (TATOLI)—Kazu pozitivu COVID-19, aumenta ona ba na’in 27 ne’ebé oras ne’e na’in 26 baixa iha sala izolamentu Vera Cruz no na’in-ida baixa iha Rejiaun Administativa Espesiál Oe-cusse Ambeno (RAEOA).

Númeru pozitivu ne’e aumenta, hafoin Ministériu Saúde liuhosi ekipa vizilánsia deteta tan na’in tolu, no anunsia iha kinta ohin.

Notísia Relevante:Timoroan na’in rua pozitivu COVID-19, pasiente aumenta ba 24

“Ohin komisaun nasionál rejista tan Timoroan na’in-tolu ne’ebé konfirmadu pozitivu COVID-19, kompostu hosi feto ida no mane na’in-rua,” Koordenadora Pilár III COVID-19, Josefina Clarinha João informa liuhosi konferénsia Imprensa iha salaun MS, Caicoli, kinta (04/02).

Doutóra ne’e esplika, entre sira na’in-tolu, iha na’in-ida sidaddaun bai-bain no na’in-rua seluk nu’udár estudante.

“Feto ho idade 21 no mane ida ho idade 22 no ida seluk idade 29. Sira na’in-tolu laiha síntoma,” nia subliña.

Nia hatutan, pasiente idade 21 antes ne’e hela iha konventu ida iha Kupang, Indonézia Osidentál no mane idade 22 nu’udár estudante iha universidade ida iha Bali.

Sira mai hosi Indonézia hosi provínsia ne’ebé la hanesan, iha 20 janeiru 2021 no tama Timor-Leste liuhosi pontu entrada Batugade hamutuk ho pasajeiru na’in 118.

Iha Dili, sira kumpri kuarentena obrigatóriu iha otél Novo Horizonte, ekipa vizilánsia epidemolójika ba halo teste swab dahuluk iha loron 21 janeiru ho rezultadu teste negativu, teste daruak foti iha 1 fevereiru no iha 3 fevereiru rezultadu laboratóriu hatudu katak, sidadaun na’in rua ne’e pozitivu COVID-19.

“Horikalan ekipa jestaun kazu hosi Pilár VII evakua ona pasiente na’in-rua ne’e ba sala izolamentu Vera Cruz, Dili,” Josefina Clarinha informa.

Mane ida ne’ebé ho idade 29, nia hatutan, iha 20 janeiru 2021 sai hosi Salele, Munisípiu Covalima ba Atambua Indonézia liuhosi dalan ilegál iha 22 janeiru nia desisdi fila-mai TL liuhosi Malaka no tama nafatin liuhosi dalan ilegál parte Salele nian.

Iha loron 22 ne’e kedan, Polísia Nasionál Timor Leste (PNTL) liuhosi Unidade Patrullamentu Fronteira (UPF) detein no transporta hodi submete iha kuarentena.

“Ekipa vizilánsia ba foti amostra swab, no rezultadu teste hatudu katak, sidadaun ne’e pozitivu COVID-19. Oras ne’e daudaun ekipa prepara ona atu transporta mai sala izolamentu Vera Cruz, Dili,” nia dehan.

Iha kuarentena Suai, nia hatutan, iha ema na’in 16 mak kumpri hela kuarentena, na’in 15 nu’udár ekipa serbisu hanesan médiku, enfermeiru, pesoál limpeza no seguransa.

Entretantu, dadus 4 fevereiru 2021 komulativu teste 19.506, hein rezultadu 55, komulativu kazu 80, kazu foun 3, komulativu negativu 19.371, atuál baixa 27 kompostu hosi Dili 26 no RAEOA 1.

Alende ne’e, sira ne’ebé mak iha hela kuarentena hamutuk 235 kompostu hosi Dili 121 no munisípiu 114, auto-kuarentena  149 kompostu hosi Dili 142 no munisípiu 7.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here