Prezidente KAEES, Maria Filomena Lay Guterres. Imajen/média UNTL.

DILI, 08 fevereiru 2021 (TATOLI)—Komisaun Asesu Engresu Ensinu Superiór (KAEES) klarifika katak, estudante barak ho valór boot entre 50 to’o 54 la admitidu iha Universidade Nasionál Timor Lorosa’e (UNTL) no Institutu Politékniku Betano (IPB), tanba lakon iha opsaun kursu tolu ne’ebé sira rasik hili.

Prezidente KAEES, Maria Filomena Lay Guterres, hateten atu defini estudante ida admitidu ka la admitidu, ne’e sira rasik mak deside tanba sira mak tuir ezame, sira mak hili primeira, segunda no terseira opsaun.

Notísia Relavante:Estudante 5.582 admitidu ba UNTL no IPB

Maria Filomena Lay fó ezemplu, hanesan kursu medisina jerál nia kritéria valór tenke 50 to’o 54 no bainhira estudante ida hili primeira opsaun ho valór 49 ba karaik, entaun nia labele tama.

“Iha segunda opsaun bele tama, bainhira ema sira ne’ebé hili primeira opsaun ne’e iha valór hanesan ho ninian ou kiik liu fali. Maibé, bainhira valór hosi ema ne’ebé hili segunda opsaun  no primeira opsaun valór boot-liu, enkuantu vaga ne’e prienxe hotu ona, entaun labele tama tanba nia rasik mak hili,” Prezidente KAEES hateten ba jornalista sira iha serbisu fatin MESSK, Colmera, segunda (08/02).

Ezemplu seluk tan maka, bainhira estudante ida ho valór 45 hili departementu ida ne’ebé maioria estudante sira seluk ninia valór ki’ik-liu, klaru katak estudante ne’e tenki liu.

“Maibé, estudante ne’e mak hili fali segunda ka terseira opsaun ne’ebé mak ema prienxe hotu ona, automatikamente nia sei la liu, tanba ema sira hili segunda no terseira opsaun ne’e mós sai primeira eskolla ba sira,” nia dehan.

Diretora Jéral Ministériu Ensinu Superiór Siénsia no Kultura (MESSK) ne’e subliña, tanba ida ne’e maka estudante ho valór kiik bele tama no mosu polémika katak, ema ne’ebé ho valór bo’ot la admitidu maibé sira ne’ebé ho valór ki’ik mak admitidu.

Polémika ne’e halo Prezidente KAEES fiar liu tan katak, sistema ne’ebé utiliza maski seidauk diak-liu, maibé bele garante duni prosesu korresaun ho transparente hodi halo definisaun loloos kona-bá asesu engresu estudante foun ba UNTL no IPB.

Notísia Relavante:PN husu MESSK klarifika mekanizmu selesaun estudante foun ba UNTL

Jornalista: Tomé Amado

Editór: Cipriano Colo

2 KOMENTÁRIU

  1. lei sira hanesan nee lamerese atu implementa iha Timor Leste,studante nee hetan valor bot husi ministerio edukasaun liu husi ijame nasional,tuir lolos husi ministerio tenki Bangga ho kwalidade nebe maka estudante nee hetan no sai ijemplo ba oan sira seluk atu banati tuir,ita fo tia valor nebe maka as depois ita rasik fali maka hamihis ou hatun kwalidade estudante nee ninian no lahare ba impaktu negativu nebe maka mosu hanesan sai perguntas boot ba kwalidade aprendijasen iha eskola,kwalidade teste ijame nasional,no bele mos hamenus motivasaun ita nia oan sira seluk atu estuda iha eskola no kuda mos fini oportunista ba juventude sira katak moris diak nee hanesan lalika hakaas an no mosu hanesan milagre katak lalika liu husi terus no pasiensia ,ho nune ami inan aman husu ba nai ulun sira atu hare tok lei sira nee ,nunee labele loke dalam ba estudante sisipan ou titipan ba ema sira nebe maka iha relasaun familiar iha ita nia universidade nee nia laran.

  2. tuirloss fo hatene hatena ka informa ba estudante katak iha jurusan tolu , premeiru, segundo no treseiru nebe ita hili vaga too ona no ita nem la too, maibe ita jurusan seluk iha untl nebe sei bele simu ita nia nem nee, depois estudante maka sei hataan ba untl katak nia hakarak ba jurusan nee ka lae. see nia hakarak antaun husik liu ka tama ba no husik ida be ho nem kiik liu nia nemak sai. kecuali estudante ho nem boot nemak lakoi atu jurusan nebe untl ofrese ba nia hanesan Jurusan alternativu ba hirak tolu nebe nia la liu. ho nune maka untl sei akumula estidente hirak nebe ho nem boot boot deit, no too ikus untl sei produce graduadu nebe ho qualidade aas. selae drop out bar barak, tanba hirak nebe ho nem kikk tama ba hodi hadau tia hirak ho nem boot no iha espiritu diak ba estuda. atu fosalah ba estudante??? Koitadu, sira ense formulario antes simu resultadu exame nacional, oinsa mak sira hatene sira nia nem boot too iha nebe.

HAKEREK NO HATÁN

Please enter your comment!
Please enter your name here