Membru PN hosi Bankada PD, António da Conceição ‘Kalohan'. Imajen TATOLI/António Gonçalves

DILI, 08 fevereiru 2021 (TATOLI)–Reprezentante povu iha uma fukun Parlamentu Nasionál (PN) husu Governu liuhosi Ministru Ensinu Superiór, Siénsia no Kultura (MESSK) atu halo klarifikasaun ba públiku kona-ba prosesu selesaun ba estudante foun ne’ebé asesu ba Universidade Nasionál Timor Lorosa’e (UNTL).

Notísia Relevante: Estudante 5.582 admitidu ba UNTL no IPB

Membru Parlamentu Nasionál, Deputadu António da Conceição, hateten deskontentamentu ne’ebé mosu tanba estudante barak valór boot maibé la pasa iha UNTL.

“Sira-nia oan valór aas maibé la admitidu iha UNTL. Ha’u hanoin iha opurtunidade ida-ne’e, ministru tenke fó klarifikasaun ida ba prosesu selesaun no mekanizmu ba rejime hotu-hotu nian, para nune’e populasaun bele hatene,” Xefe Bankada Partidu Demokrátiku ne’e levanta liuhosi plenária, Parlamentu Nasionál, segunda ne’e.

Kalohan haktuir, Ministru Ensinu Superiór, Siénsia no Kultura, ne’ebé fó ona rezultadu kona-ba admisaun ba UNTL nian tenke halo klarifikasaun ba públiku kona-ba selesaun no mekanizmu atu asesu ba UNTL.

“Loos duni limitasaun fasilidade mak UNTL iha, sertamente la fó meiu atu timoroan sira hotu bele asesu ba UNTL. Maibé mosu lamentasaun mai hosi populasaun sira kuaze territóriu nasionál sira-ne’ebé mak interesadu atu sira-nia oan tenke ser tama iha UNTL nian,” nia dehan. 

Iha fatin hanesan, deputadu Bankada FRETILIN, David Dias Ximenes “Mandati”, propoin loke investigasaun ba prosesu selesaun refere.

“La’ós ha’u kondena maibé husu investiga took, nune’e bele kurrije tiha situasaun sira-ne’e,” David Dias Ximenes “Mandati” propoin.

Mandati husu loke investigasaun tanba estudante balun ho valór boot maibé la admitidu ba UNTL.

Jornalista: Evaristo Soares Martins

Editór: Cancio Ximenes

2 KOMENTÁRIU

  1. Boatarde hau atu husu deit tamba sa ami ho valor nebe bot la liu iha selesaun ida ne..se bele fo tan oportunidade ida mai ami nebe la liu hodi bele rejistu fila fali atu nune ami bele kontinua ami nia estudu iha esncino superiros UNTL
    tamba ami iha valor nebe bot 42 ami tes dala 2 ona maibe la liu nafatin
    ami atu eskola iha eskola seluk maibe ami nia inan aman Agrikultor sira la prontu husu ita nia tulun bele iha tan oportunidade ba dala II atu nune ami bele asesu fali🙏🙏🙏🙏🙏

  2. Sistema Ministerio Edukasaun Nia n lalos Diak liiu kedas Tenki halo investigasaun ba ekipa nb maka durante ne halo koreksaun ba estudante Sira Nia valor hodi hatam ba sistema katak bele passa ih UNTL ou Lae,,
    Tamba w Nia subrinho Rasik Nia valor 46 myb naran la sai ou la passa ih Untl n tmba saida,
    Krk atu kolia konaba estandar lolos Ministerio Edukasaun nian n hnusa, tmb valor 46 ne Liu dook on hosi estandar nno merese Duni Tenki passa ih UNTL, myb id n laih fali Ema nb MK valor kiik Liu kedas hosi 36 bl passa fali..
    Ami povo aileba, no ain TANAN sira ladun satisfas ho sistema familia rismo, hodi fo Moris dt ba grupu balu Nia oan MK dak,
    Nb Diak Liu Tenki halo investigasaun id ba Ministerio Edukasaun nomos ba ekipa nb MK durante n halo koreksaun.

HAKEREK NO HATÁN

Please enter your comment!
Please enter your name here