Logotipu UNTL

DILI, 05 fevereiru 2021 (TATOLI)— Estudante rejimi jerál no rejimi espesiál ne’ebé admitidu atu asesu ba Ensinu Superiór Públiku Universidade Nasionál Timor Lorosa’e (UNTL) no Institutu Politékniku Betano (IPB) ba tinan akadémiku 2021 hamutuk 5.582.

Totál ne’e, rejimi jerál fó oportunidade ba finalista hosi Ensinu Sekundáriu ne’ebé remata iha iha 2020, no rejimi espesiál fó oportunidade ba kandidatu sira ne’ebé iha situasaun esensiál.

Notísia Relevante:Governu deside ona totál vaga 910 ba oan ki’ak asesu UNTL

Prezidenti Komisaun Asesu Enggresu Ensinu Superiór (KAEES), Maria Filomena Lay Guterres, hateten totál estudante hosi Ensinu Sekundáriu Jerál (ESJ) no Ensinu Sekundáriu Tékniku Vokasionál (ESTV) ne’ebé prienxe buletim hamutuk 23.460, no sira ne’ebé la prienxe buletim hamutuk 528.

“Estudante ne’ebé la admitidu  hamutuk 19.385 no sira ne’ebé admitidu hamutuk 4.075. Hosi totál númeru admitidu ne’e sira ne’ebé asesu ba UNTL 3.865 no IPB 210,” Maria Filomena Lay Guterres esplika.

Entretantu, totál kandidatu ba rejimi oportunidade ne’ebé halo inskrisaun hamutuk 4.483 no sira ne’ebé tuir ezame 3.998, la tuir ezame 485, admitidu ba UNTL no IPB 457. Hosi númeru ne’e 422 ba UNTL no 35 ba IPB.

Ba kategoria veteranu no mártir nia-oan totál estudante ne’ebé halo inskrisaun 1.705, ne’ebé tuir ezame 1.591, la tuir ezame 114. Hosi totál númeru ne’e, na’in 681 admitidu, na’in 661 ba UNTL no na’in 20 ba IPB, enkuantu sira ne’ebé la admitidu iha 910.

Alende ne’e, kategoria rejimi hakbi’it ho totál kandidatu ne’ebé halo inskrisaun 252, admitidu ba UNTL no IPB 121. Hosi númeru ida ne’e, 106 ba UNTL no 15 ba IPB. Nune’e, totál kandidatu ne’ebé preparadu atu asesu ba UNTL no IPB hamutuk 5.582, UNTL 5.272 no IPB 310.

Antes ne’e, vaga ne’ebé KAEES  simu hosi Konselllu Jerál UNTL no IPB hamutuk 4.620, maibé númeru estudante ne’ebé admitidu aas-liu vaga ne’ebé prevee ho diferensa 962.

Prezidenti KAEES klarifika katak,  diferensa ne’e akontese tanba inklui ona estudante 130 ne’ebé hetankualifikasaun di’ak hosi kada munisípiu.

Prosesu asesu Ensinu Superiór Públiku ba estudante foun tinan akadémíku 2021, bazeia ba diploma Ministeriál númeru 32/2020, 16 setembru.

Notísia Relevante:MESSK sei publika lista estudante rejime espesiál iha 30 janeiru

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here