LIQUIÇA, 05 fevereiru 2021 (TATOLI)—Reprezentante Juventude Suku Tibar, Adriano de Jesus Henrique, husu ba na’i-ulun sira liu-liu ba parte relevante sira atu aselera planu resiklajen lixu nian.
Notísia Relevante: FDCTL-komunidade Libaulelo lamenta lixu iha Tibar
“Ami husu ba na’in ulun sira atu aselera fali planu resiklajen uluk atu halo mak seidauk ne’e, presiza aselera fali para garante. Se lae, komunidade mak kontinu sofre no terús ba importasaun lixu hosi munisípiu rua nian,” Adriano de Jesus Henrique rekomenda bainhira partisipa iha koferénsia imprensa iha Tibar, sesta ne’e.
Nia dehan, parte saneamentu Munisípiu Dili no Ermera nian laiha jestaun fakar lixu, tanba nia impaktu makaas ba komunidade iha Suku Tibar tanba lixu nia iis makaas hodi afeta ba komunidade sira-nia saúde.
Entretantu, Xefe Aldeia Libalelo, Domingos Serão de Fátima da Conceição, husu ba VIII Governu atu buka solusaun ba kestaun lixu iha Tibar tanba komunidade iha Tibar enfrenta moras oioin bainhira sunu lixu.
“Ami komunidade Tibar sofre barak ona ho lixu ne’ebé mak soe iha Tibar. Lixu ne’e fó impaktu boot ba ami-nia saúde, liuliu ba ami Libaulelo ne’e. Tanba ne’e, ha’u nu’udar autoridade lokál husu ba VIII Governu Konstitusionál atu buka solusaun ba lixu ne’ebé mak agora fó impkatu ba ami suku Tibar nian,” nia dehan.
Iha fatin hanesan, komunidade Suku Tibar, Xisto Fernandes Almeida hateten iha enkontru entre parte relevante sira, sira-nia parte ko’alia beibeik ona maibé lixu sira-ne’e nafatin soe ka fakar iha fatin-lixu Tibar nian.
Nia kontinua alerta katak lixu iha munisípiu ida ba fakar munisípiu seluk hodi hamosu de’it moras ba ema nia-saúde. Tanba ne’e sujere nafatin ba autoridade rua ne’e nian tenke buka ona solusaun ida para soe rasik nia lixu ne’e.
Nia hatutan, se Governu deside no hakarak nafatin iha Tibar entaun tenke prepara makina rua permante iha Tibar hodi kee kuak no hakoi tiha no labele sunu, nune’e labele prejudika komunidade Libaulelo nia saúde.
“Tanba ami komunidade Tibar sente lixu Tibar hanesan Ramelau kedua tanba hateke hosi Dili no Liquiça haree ai-su’ar sa’e boot no makaas tebes,” nia argumenta.
Notísia Relevante: Presiza Kria Polítika Resiklajen
Jornalista: Osória Marques
Editór: Cancio Ximenes
