Diretór Diresaun Nasionál Organizasaun Urbana, Hermínio Moniz Ribeiro. Imajen Tatoli/Julia Chatarina

DILI, 27 janeiru 2020 (TATOLI)–Diretór Diresaun Nasionál Organizasaun Urbana, Hermínio Moniz Ribeiro, hateten presiza kria polítika resiklajen ida atu nune’e lixu sira labele ba para hotu Tibar.

Diretór ne’e dehan, resiklajen ba lixu tenke iha tanba haree ba lixu sira hanesan botir, áqua mamuk, plástiku, vidru no lixu seluk tan hanesan produtu ne’ebé bele sai sasán ne’ebé útil.

“Ami hanoin ona para oinsá ita bele halo polítika resiklajen, tanba ita presiza polítika ida hodi haree lixu sira-ne’e labele ba hotu Tibar maibé lixu sira-ne’e ita bele utiliza ka transforma sai fali produtu ida ita bele fa’an fali no uza”, Hermínio ba Agência TATOLI iha ninia knaar fatin, Caicoli, segunda ne’e.

Notísia Relevante: TNA Solution Aprezenta Proposta Investimentu Jestaun Rezídu Sólidu Urbanu ba KM

Tuir nia, bainhira iha polítika resiklajen, lixu sira iha Dili laran ne’ebé butuk iha Tibar komesa redús ona.

“Kuandu ita redús ona lixu signifika katak rai-ko’ak ida iha Tibar ne’ebé ema bolu ateru-kontroladu ne’e atu nakonu ne’e kle’ur, bainhira ita halo ona resiklajen”, nia akresenta.

Diretór ne’e haktuir, antes ne’e, Diresaun Nasionál Organizasaun Urbana serbisu hamutuk ho Programa Nasaun Unida ba Dezenvolvimentu (UNDP-sigla Ingléz) hodi halo resiklajen iha parte Igreja Motael, Colmera, Kampung-Alor no Caicoli, maibé seidauk hatudu rezultadu ne’ebé di’ak tanba ema uitoan de’it maka prodús lixu sira-ne’e sai produtu ida.

Nia subliña, polítika ida resiklajen ne’ebé daudaun ne’e hanoin atu halo, sei presiza orsamentu boot uitoan, nune’e fó ba kompañia ne’ebé bele fó serbisu ba ema barak atu bele halo resiklajen ba lixu sira ne’ebé iha Dili laran no presiza mós iha ajénsia ruma bele tau-matan.

Nune’e mós, nia refere uitoan kona-ba separasaun lixu sira iha Dili laran.

“Separasaun ne’e ezemplu ita bá soe lixu, iha ne’ebá sira tau fatin tolu ka haat hanesan ne’e. Bainhira ita soe lixu verde, botir, masa mamuk, surat-tahan, ka plástiku ne’e idak-idak tau tuir ninia fatin nune’e ida-ne’ebé maka resiklajen ita uza fali no ida-ne’ebé mak la’os resiklajen ita bele ba soe iha Tibar”, nia salienta.

Diretór ne’e dehan tan, lixu sira bainhira para ona iha ateru-kontroladu maka enjineiru sira sei halo modelu hanesan rai-ko’ak ida atu líkidu sira ne’ebé iha kímiku maka’as  bele tama ba iha rai, nune’e labele kontamina ba animál tasi nian.

Antes ne’e, liuhosi reuniaun Konsellu Ministru loron outubru 2019, Governu rona aprezentasaun Proposta Investimentu Privadu ba Jestaun Rezídu Sólidu Urbanu husi Kompañia TNA Solution, atubele halo resiklajen ba lixu iha kapitál Dili, maibé iha tenpu ne’ebá seidauk iha desizaun.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here