Vise-Dekanu Asuntu Finansa UNTL, Júlio Aparício. Imajen Tatoli/Tomé Amado.

DILI, 05 fevereiru 2021 (TATOLI)—Fakuldade Siénsia Sosiál (FSS) rekomenda ba Universidade Nasionál Timor Lorosa’e (UNTL), atu prepara kondisaun ba estudante defisiente sira ne’ebé hala’o hela estudu iha Departementu Kursu Inkluzaun Komunitária Sosiál (IKS).

Vise-Dekanu Asuntu Finansa UNTL, Júlio Aparício propoin atu prepara fasilidade ne’e hanesan matéria eletrónika, letra Braille, aumenta tadutór no asesibilidade fasilidade sira iha edifisiu liuliu iha andar leten.

Notísia Relevante:Ema ho defisiénsia 4.000 maka asesu edukasaun husi totál rihun 38

“Ita rekomenda ne’e tanba oras ne’e daudaun iha Fakuldade Siénsia Sosiál Kursu Inkluzaun Komunitária Sosiál rejista ona estudante defisiente na’in 32, maibé sei uza hela sala-de-aula neen iha andár okos,” Júlio Aparício hateten ba jornalista Agência Tatoli, iha serbisu fatin, sesta (05/02).

Dosente ne’e mós apoia tebes inisiativa universidade nian liuhosi FSS hodi hamosu tan departementu kursu Inkluzaun Komunitária Sosiál, tanba hakarak trata ema hotu hanesan, labele iha diskriminasaun liuliu ba ema ho defisiénsia, maibé presija mós tau-matan ba fasilidade sira.

Oras ne’e daudaun, estudante defisiente iha departementu ne’e hamutuk na’in 32, na’in-tolu iha ona semester III, na’in-tolu iha ona semester VI, no na’in 26 mak foin semester I.

“Sira hotu integra hamutuk ho estudante sira seluk ne’ebé kategoria laiha problema ho sira ninia an,” nia subliña.

Estudante defisiente hirak ne’e iha problema matan, tilun, ain no liman, ne’ebé hetan apoiu hosi dosente espesializadu iha letra Braille no Lian Jestuál hosi Asosiasaun Defisiénsia Timor-Leste (ADTL).

Júlio Aparício esplika, durante prosesu aula prezensiál estudante sira ne’ebé problema ho matan simu matéria hosi dosente espesializadu ho letra Braille.

“Matéria ne’e dosente sira kopia tiha ba elektróniku, entrega ba dosente espesializadu atu prepara fali ba letra Braille nune’e bele uza hodi hanorin. Ba maluk defisiente tilun, iha tradutór ida hodi halo tradusaun ho jestuál bainhira dosente sira halo esplikasaun,” nia dehan.

Vise-Dekanu ne’e fiar katak, maski estudante sira la haree no rona, maibé ho mekanizmu ne’e sira bele komprende matéria ne’ebé dosente sira esplika durante prosesu aprendizazen.

Notísia Relevante:2018-2020 defisiente matan 34 frekuenta estudu iha Ensinu Rekorrente

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here