Ministreiu Edukasaun halao worshop ho tema Sosialisaun Planu Nasional ba Ema ho Defisiensia ba Setor Edukasaun 2020-2024, iha Salaun Infordepe, Balide Dili, 1 Otubro 2020.Imajen/Antonio Goncalves

DILI, 01 outobru 2020 (TATOLI)-Vise Ministru Edukasaun Juventude no Desportu (MEJD), António Guterres, hateten daudaun ne’e ema ho defisiénsia fiziku purvolta rihun 4 maka asesu ona edukasaun husi totál rihun 38-resin iha Timor-Leste.

“Ita bele kalkula rasik husi totál ema ho defisiénsia  rihun 38 ne’ebé rejista maibé foin rihun 4 mak asesu ba edukasaun ne’e, ha’u bele dehan pursentajen sei ki’ik, tanba ne’e, ita presiza esforsu aan nafatin para to’o 2024 númere ne’e bele sa’e tan,  ne’e mak ita-nia hakarak,” dehan Governante durante worshop ba sosializasaun planu asaun nasionál ba ema ho defisiénsia iha setór edukasaun ba 2020-2024 ne’ebé hala’o iha salaun INFORDEPE Balide, kinta ne’e.

Notísia Relevante:Governu Kontinua Implementa Polítika Nasionál no Edukasaun Inkluzivu

Planu asaun nasionál ne’e hodi fó oportunidade ba Timoroan sira ne’ebé ho problema defisiénsia fiziku atu bele asesu edukasaun ho di’ak liután.

“Atu atinje mehi sira ne’e maka Ministériu Edukasun hamutuk ho Ministériu Solidaridade Sosiál  no Inkluzaun no Ajénsia Parseira Austrália Aid realiza workshop ne’e atu elabora ho didi’ak planu estratejia sira ne’e hodi bele responde nesesidade espesiál to’o 2024 ba ema ho defisiensia sira bele asesu hotu ba edukasaun inkluziva,” nia dehan.

Iha fatin hanesan Diretór Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso, hateten pursentajen ema ho defisiénsia matan barak liu maka seidauk asesu edukasaun inkluziva tanba seidauk iha fasilidade adekuadu hodi suporta sira durante prosesu aprendizajen hahú husi ensinu báziku to’o superiór.

Totál defisiénsia matan iha Timor-Leste hamutuk 14.828, husi númeru ne’e ema na’in 10 maka estuda ona iha ensinu superiór, enkuantu ensinu báziku to’o sekundáriu nia dehan seidauk iha dadus.

“Ita foin mak iha 0,1 pursentu de’it mak asesu ba edukasaun husi totál ema ho defisiensia  matan hamutuk rihun 14.828 iha ensinu superiór foin mak ema na’in 10 de’it seidauk to’o 20,” nia hateten.

Nia konta tuir katak ba defisiénsia na’in 10 ne’ebé maka durante ne’e eskola iha ensinu superiór sei hasoru problema maka tenki uza tape recorder hodi halo gravasaun ba materia sira bainhira  dosente sira halo esplikasaun iha sala aula.

“Maibé kuandu traballu uma sira uza komputador maibe ho programa MVDA, tanba sira mak uza métodu letra brain sei difikulta dosente sira atu check  materia sira prepara,” nia hateten.

Tanba ne’e, nia husu ba Governu hodi kria kondisaun no oportunidade ba defisiénsia sira atu partisipa iha edukasaun inkluziva hodi apoiu prosesu dezenvolvimentu.

Notísia Relevante:Governu Aprova Ona Lei Edukasaun Inklusiva

Jornalista: Tome Amado

Editór : Agapito dos Santos

HAKEREK NO HATÁN

Please enter your comment!
Please enter your name here