Serbisu nain sira raut foer. Imajen Tatoli/Cipriano Colo

DILI, 02 jullu 2020 (TATOLI)–Departamentu Saneamentu Munisípiu Dili, Domingos Soriano, hateten ekipa saneamentu ne’ebé raut no foti foer iha Kapitál Dili ba kada loron ida, sira foti rotajen ka ret 150 hodi ba fakar iha lixu-fatin Tibar-Liquiça.

“Ita loron-loron foti 150 retajen tanba ita iha kareta 50 ne’ebé mak kobre iha sidade Dili. Loron ida, kada karreta tenke foti retajen tolu (3),” dehan Xefe Departamentu Saneamentu Munisípiu Dili, Domingos Soriano, ba Agência TATOLI iha nia servisu fatin, Caicoli, Dili, kinta ne’e. 

Tanba, nia esplika, produsaun foer ne’ebé mak barak iha Sidade Dili ne’e mai hosi ema sira liuliu ema sira ne’ebé halo negosiu iha merkadu no dalan públiku sira ne’ebé ema konsentra hodi faan sasán.

“Foer sira ne’e prodús hosi ema mak barak liu. Natureza ladún iha tanba tuir ha’u-nia haree, foer ne’e mai hosi komunidade mak prodús barak liu. Ha’u bele dehan produsaun foer ne’e hosi ema barak liu iha sidade laran, hanesan dos-mamuk, ákua, plastiku, no foer hosi uma-kain nian hanesan modo-tahan, etu foer, no seluk tan,” nia dehan.

Ida ne’e akontese, nia hateten, tanba Governu adota merkadu livre iha Timor-Leste entaun ema estranjeiru sira inklui timoroan sira ne’ebé mak hela iha foho mós livre hodi faan sasán ne’ebé dalaruma soe no prodús foer ho volume boot tebes.

“Ita-nia estadu Timor-Leste adota merkadu livre hodi ema sé de’it bele halo negósia iha ne’ebé mak nia hakarak. Hanesan xineza sira loke loza iha fatin-fatin no ita Timor mós faan iha dalan ninin sira. Entaun, ho ne’e hamosu foer iha dalan-dalan no iha estrada ninin sira ne’e,” nia relata.

Nia haktuir, uluk tempu indonézia faan iha fatin ne’ebé mak Governu no Estadu prepara ona, la’ós faan iha dalan no estrada ninin entaun foer ladún iha.

Jornalista : Osória Marques

Editór      :  Cancio Ximenes

HAKEREK NO HATÁN

Please enter your comment!
Please enter your name here