Koordenadór pilár hitu COVID-19, Nilton da Silva. Imajen/Felicidade Ximenes.

DILI, 03 fevereiru 2021 (TATOLI)—Ministériu Saúde (MS) rejista tan Timoroan na’in rua pozitivu COVID-19 no númeru pasiente ne’ebé baixa iha sala izolamentu aumenta ba 24.

“Ohin, 3 fevereiru 2021 hosi komisaun nasionál prevensaun COVID-19, rejista tan Timoroan na’in rua ne’ebé konfirmadu pozitivu, kompostu hosi feto ida ho idade 34 no mane ida ho idade 22. Sira na’in 2 laiha síntoma,” Koordenadór Pilár VII COVID-19, Nilton da Silva fó sai rezultadu ne’e liuhosi Konferénsia Imprensa iha Salaun MS Caicoli, kuarta (03/02).

Notísia Relevante:Sidadaun estranjeiru na’in lima pozitivu COVID-19, Baixa na’in 22

Nilton esplika, Timoroan na’in rua ne’e mai hosi nasaun viziñu Indonézia hosi provínsia ne’ebé la hanesan, iha 20 janeiru sira tama mai Timor-Leste liuhosi pontu entrada Batugade hamutuk ho pasajeiru na’in 118.

Bainhira iha Dili, nia hatutan, sidadaun na’in rua ne’e kumpri kuarentena obrigatóriu iha otél la hanesan, ida iha otél Leokase no ida seluk iha otél Time Square.

“Hosi ekipa vizilánsia epidemolójika ba halo teste swab dahuluk  iha dia 21 janeiru ho rezultadu teste negativu, teste daruak foti iha 1 fevereiru no iha 2 fevereiru rezultadu RT- PCR hatudu pozitivu SARS CoV-2,” nia subliña.

Médiku ne’e mós informa katak, Minstériu Saúde kontinua nafatin hala’o enkontru koordenasaun ho parte hotu-hotu hodi kombate COVID-19 iha Timor-Leste.

Entretantu, dadus 3 fevereiru 2021 hatudu katak, kazu Foun: +2, komulativu kazu: 77, atuál baixa 24 kompostu hosi Dili 23 no Rejiaun Administrativa Espesiál Oe-cusse Ambeno (RAEOA) 1.

Notísia Relevante:Autoridade RAEOA izola pasiente COVID-19 na’in ida

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here