Koordenadora Jerál Komisaun Nasionál COVID-19, Odete da Silva Viegas. Imajen/Felicidade Ximenes.

DILI, 29 janeiru 2021 (TATOLI)—Ministériu Saúde (MS) liu hosi Autoridade Rejiaun Administrativa Espesiál Oe-cusse Ambeno (RAEOA), rejista Timoroan na’in ida pozitivu COVID-19, no izola ona iha sentru izolamentu Oe-cusse.

“Ohin 29 janeiru 2021, ita rejista tan estudante Timoroan na’in ida ne’ebé konfirmadu kazu COVID-19, pasiente mane ho idade 15 asintomátiku no oras ne’e daudaun ekipa saúde  izola ona iha sala izolamentu RAEOA,’’ Koordenadora Jerál Komisaun Nasionál COVID-19, Odete da Silva Viegas, ba jornalista sira liuhosi konferénsia imprensa, iha Palásiu Sinzas, sesta (29/01).

Notísia Relevante:Timoroan ida pozitivu COVID-19, baixa aumenta ba 18

Odete konta tuir kronolojia viajen hosi Timoroan ne’e katak, iha loron 4 janeiru 2021, nia ba iha Fatubanao-Atambua  atu prolonga viza, no hela iha ne’ebá durante semana rua.

“Iha loron 18 janeiru tuku 13:30 oras Indonézia nian, sidadaun ne’e viajen husi Atambua muda ba fronteira Wini-Kefa no toba tan kalan rua iha ne’ebá. Iha loron  20 janeiru 2021 nia tama mai Timor-Leste liuhosi fronteira Sakato Oe-cusse hamutuk ho estudante na’in hitu. Ekipa vizilánsia COVID-19 koloka kedan sira ba halo kuarentena iha otél Oe-upun, iha RAEOA,” Odete esplika.

Ekipa vizilánsia halo teste swab ba sidadaun hirak ne’e  iha loron  28 janeiru no rezultadu teste hosi laboratóru relata katak, sidadaun ne’e mak pozitivu COVID-19, no evakua kedan ba sala izolamentu.

“Ita-nia maluk ne’ebé hela iha kuarentena Oe-upun hamutuk na’in 68, sira tama iha  loron ne’ebé la hanesan. Sira ne’ebé liuhosi dalan legál na’in ualu no 56 seluk liuhosi dalan illegal,” nia subliña.

Oras ne’e daudaun, pasiente ne’ebé submete ba izolamentu iha Vera Cruz, Dili, nafatin ema nai’n 18 no ida mak halo izolamentu iha RAEOA.

Dadus loron 29 janeiru 2021, kazu komulativu teste  18.902, hein rezultadu 166, Komulativu Kazu 69, komulativu rekuperadu 50 aumenta haat  hamutuk 54, kazu foun ida, atuál baixa 19.

Rezultadu negativu  18.667, totál Kuarentena  230, Dili 128, Munisípiu 102, auto kuarentena  192, Dili 181, Munisípiu 11, Pasa ona loron 14 na’in 7.497, Dili 6.182, Munisípiu 1.315.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here