Koordenadora Jerál Komisaun Nasionál Prevensaun COVID-19, Odete da Silva Viegas. Imajen Tatoli/Felicidade Ximenes.

DILI, 02 fevereiru 2021 (TATOLI)—Ministériu Saúde (MS) rejista tan sidadaun estranjeiru na’in lima pozitivu COVID-19 ne’ebé izola ona iha sala izolamentu Vera Cruz, no numéru baixa aumenta ba 22, ohin mós reintegra pasiente rekoperadu na’in rua.

“Ohin, loron 2 fulan fevereiru 2021, komisaun nasionál prevensaun COVID-19, rejista tan sidadaun estranjeiru na’in lima, família ida ne’ebé konfirmadu pozitivu COVID-19 kompostu husi mane na’in tolu no feto na’in rua,” Koordenadora Jerál Komisaun Nasionál Prevensaun COVID-19, Odete da Silva Viegas, ba jornalista sira liuhosi konferénsia imprensa iha salaun Ministériu Saúde, tersa (02/02).

Notísia Relevante:Autoridade RAEOA izola pasiente COVID-19 na’in ida

Odete esplika, entre sidadaun na’in lima ne’e iha mane na’in tolu ho idade 52, 50, 15 no feto na’in rua ho idade 14 ho 18, sira ne’e hotu asintomátiku.

“Sira hosi Tanzánia iha loron 17 janeiru 2021 to’o Dili iha loron 20 janeiru. Sira tun iha Aeroporto Nicolau Lobato Comoro ho aviaun Malázia Airlines. Sira halo auto-kuarentena iha Lorenço Campound Metiaut no fatin refere prienxe duni prosedimentu COVID-19,’’ Odete subliña.

Teste swab hosi sidadaun na’in lima ne’e foti iha loron 29 janeiru, rezultadu RT- PCR pozitivu SARS CoV-2 relata iha 01 fevereiru no fó sai ba públiku iha loron 02 fevereiru.

“Iha loron 20 janeiru, pasajeiru Malázia Airlines hamutuk ema na’in 75. Iha Dili sira hela iha otél  la hanesan no apartamentu 19, hanesan  Arbiru Beach, otél Timor, Kampaun Beach House, Rezidénsia Malinamok, Villa Mata Rua, JL Vila, Kampaun Menoa, otél Time Square, Villa Bemori, Jack Sing Apartement, Kampaun Timor Resort, Beach Garden, Palm Beach, Rezidénsia Tuana Laran, Ray Garden Apartament, Rezidénsia Jacinto, Villa Mar, USA Embassy no Rezidénsia Comoro,’’ nia akresenta.

Ohin, loron 02 fevereiru Ministériu Saúde fó sai hikas pasiente rekoperadu COVID-19 na’in rua. Mane ho idade 16 baixa iha loron 24 janeiru, teste dahuluk foti iha loron 28 janeiru no teste daruak iha 01 fevereiru no rezultadu negativu.

Alende ne’e, feto ida ho idade 29 ne’ebé baixa iha loron 23 janeiru, teste dahuluk foti iha loron 28 janeiru no teste daruak foti iha loron 01 fevereiru  no rezultadu hatudu negativu.

“Nune’e, pasiente na’in rua ne’e ohin alta ona hosi sala izolamentu Vera Cruz Dili, hodi fila ba sira-nia família,” nia informa.

Dadus ba loron 02 fevereiru tinan 2021, komulativu teste 19.223, hein rezultadu 64, kazu foun: +5, komulativu kazu 75, rekoperadu rua, komulativu rekoperadu 53+4 = 57, atuál baixa 22 Vera Cruz 21, RAEOA na’in ida.

Komulativu negativu 19.084, pasa ona loron 14 hamutuk 7.513, kuarentena 229, Dili 125, Munisípiu 104, auto-Kuarentena 183, Dili 176, Munisípiu hitu.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here