Vise-Ministra Finansa, Sara Lobo Brites. Imajen Tatoli/Egas Cristovão

DILI, 03 fevereiru 2021 (TATOLI)–Vise-Ministru Finansa, Sara Lobo Brites, hateten Governu finaliza ona saláriu ba servidór Estadu hotu-hotu iha territóriu nasionál no ohin funsionáriu hotu simu saláriu.

Notísia Relevante: Governu rekuñese foti rezerva kontijénsia selu saláriu ba funsionáriu

Nia akresenta, bainhira taka tinan hahú kedas ho orsamentu foun no situasaun sira-ne’e sempre akontese kada tinan iha fulan-janeiru sempre iha atrazu.

Kada fulan, nia dehan, tenke selu sedu maibé data atu halo pagamentu ne’e tenke ba oin uitoan. Situasaun ne’e akontese tanba Ministériu Finansa presiza atualiza dadus hotu-hotu ne’ebé aprovadu iha parlamentu.

Nia esplika, ema hotu hatene orsamentu 2021 fahe ba biliaun $1.8, muda estrutura orsamentu, muda mós kada kategoria ba fali kada programa no muda atividade, instituisaun no dirasaun foun.

Mudansa hirak ne’e, tuir nia, presiza atualiza ba sistema payroll nian tanba ne’e mak atrazu.

“Maibé, ha’u fiar katak to’o ohin ne’e ema hotu simu saláriu tanba últimu mak simu horisehik. Atrazu ne’e la’ós de’it hosi finansa maibé banku mós iha nia problema internál hodi atrazu loron ida ka rua,” Sara Lobo informa ba jornalista sira, iha Parlamentu Nasionál, kuarta ne’e.

Vise-Ministra Finansa Sara Lobo Brites hateten, saláriu ne’ebé atrazu sempre akontese taka tinan iha fulan-dezembru no tinan foun fulan-janeiru.

“Tempu krítiku ne’ebé Ministériu Finansa hasoru mak taka tinan (dezembru) no tinan foun (janeiru). Orsamentu 2020 ezekuta de’it fulan tolu ne’ebé tempu badak tebes. Depois mai tán programa lubuk ida mak tenke implementa, selu désimu terseiru. Ita bele haree katak Ministériu Finansa servisu la deskansa,” nia argumenta.

Notísia Relevante: Ajustamentu kódigu atividade, saláriu funsionáriu janeiru atrazu

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here