Vise-Ministra Finansa, Sara Lobo Brites. Imajen TATOLI/Egas Cristovão

DILI, 03 fevereiru 2021 (TATOLI)–Governu liuhosi Ministériu Finansa (MF), rekuñese foti fundu kontinjénsia hosi Orsamentu Jerál Estadu (OJE) 2019 hodi halo pagamentu saláriu ba funsionáriu sira.

OJE 2019 ho montante billiaun $1,482, distribui ba kategoria saláriu no vensimentu millaun $214, bens no servisu milliaun $472,9, transferénsia públika millaun $362, kapitál menor millaun $31,2 no kapital dezenvolvimentu millaun $400,7.

Vise-Ministru Finansa Sara Lobo Brites, esplika fundu rezerva kontinjénsia ne’e foti bainhira Governu laiha fonte seluk entaun rekorre ho kritéria tenke finánsia despeza ne’ebé labele adia (tunda) tán, rezolve kedas iha tinan fiskál ida.

“Iha situasaun 2019, ita foti duni hosi rezerva kontinjénsia ba iha pagamentu saláriu, ne’e liga liubá saláriu désimu terseiru, tanba ita hatene katak bainhira ita prepara orsamentu ita la prepara désimu terseiru,” Sara Lobo informa ba jornalista sira, bainhira halo audisaun ho Komisaun C (Finansa Públika) kona-ba Konta Jerál Estadu 2019 nian, iha Parlamentu Nasionál, kuarta ne’e.

Nia fundamenta, desizaun foti fundu kontinjénsia iha tinan fiskál 2019 ne’e liuhosi Konsellu Ministru (KM).

“Ministériu balu iha rezerva atu selu, ita labele sakrifíka fali. Ita tenke kobre nune’e funsionáriu hotu-hotu iha direitu (désimu terseiru 2019), labele fó fali prejuizu ba ema balun. Ne’e mak ita rekorre ba rezerva kontinjénsia no despeza sira seluk maibé ne’e desizaun Konsellu Ministru,” Vise MF fundamenta.

Antes ne’e, Prezidente Tribunál Rekursu Deolindo dos Santos, fó-sai katak, foti rezerva kontinjénsia atu finánsia programa ne’ebé la prevee orsamenta kontra lei.

“Rekomendasaun Câmara de Contas nian, Governu sei mellora iha futuru no bainhira ita la uza fundu kontinjénsia kuandu ita iha planu ida di’ak liu. Ministériu hotu-hotu bele iha planu di’ak entaun labele book fundu ne’e maibé Estadu iha responsabilidade labele husik,” nia argumenta.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here