Ministru Finansa, Rui Augostu Gomes. Imajen TATOLI/António Gonçalves

DILI, 25 janeiru 2021 (TATOLI)--Normalmente iha loron 18 to’o 24 kada fulan, saláriu ba funsionáriu Estadu tama ona iha idak-idak ninia konta bankária, maibé iha inísiu tinan fiskál foun ne’e iha atrazu oituan.

Ho situasaun ne’e, Ministru Finansa, Rui Augusto Gomes, klarifika saláriu ba funsionáriu Estadu atrazu duni tanba Ministériu (MF) tenke halo ajustamentu.

“Asuntu ne’ebé informa ba Xefe Governu maka saláriu ba funsionáriu Estadu sei atrazu loron rua tanba momentu ne’ebá ami tenke halo ajustamentu ba kódigu hosi atividade, tanba ne’e maka ohin mak saláriu foin tama ba ida-idak nia konta,” Ministru Rui Gomes informa, hafoin ramata reuniaun semanál ho Primeiru-Ministru, Taur Matan Ruak, iha Palásiu Governu, segunda ne’e.

Notísia relevante: Hahú ohin, Governu ezekuta OJE 2021

Iha hasoru-malu ne’e, membru ezekutivu ne’e mós simu orientasaun hosi Xefe Ezekutivu relasiona ho asuntu finansa públika.

Hahú iha loron 11 janeiru, instituisaun Estadu sira hahú simu pakote fiskál no ezekuta Orsamentu Jerál Estadu (OJE) 2021.

Iha loron 28 dezembru 2020, Prezidente Repúblika, Francisco Guterres ‘Lú Olo’ promulga OJE 2021 ho montante biliaun $1,895, foti husi reseita fundu minarai biliaun $1,377 no reseita naun petrolíferu millaun $508.

Antes ne’e, Governu aprova ona projetu dekretu Governu kona-ba ezekusaun OJE 2021, ne’ebé hakarak fó garantia efetivu no rigorozu ba kontrolu orsamentál no iha tempu hanesan bele simplifika prosedimentu ezekusaun orsamentál no fó kontinuidade ba mudansa sira ne’ebé hahú ona iha tinan 2020.

Diferensa ezekusaun OJE 2021 ho orsamentu tinan fiskál antes ne’e, eziste de’it rejime finanseiru rua, inklui implementasaun orsamentu liuhosi programa sira, halo alterasaun ba loron taka ezersísiu orsamentál ne’ebé antes ne’e iha loron 15 maibé altera taka iha loron 17, aumenta fleksibilizasaun ezekusaun orsamentál no aumentu obrigasaun halo relatóriu ezekusaun.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here