Atividade labarik sira iha Merkadu Taibesi, Labarik sira ne'e lori bote lao tama sai Merkadu Taibesi hodi buka lata mamuk hodi hili. Imajen Tatoli/Antonio Goncalves.

DILI, 03 fevereiru 2021 (TATOLI)–Komisária Komisaun Nasionál Direitu Labarik (KNDL), Dinorah Granadeiro, hateten iha Timor-Leste labarik barak mak halo atividade hanesan faan sasán iha dalan ninin maibé kategoria atu hela metin iha dalan ninin durante oras 24 ne’e seidauk iha.

Notísia Relevante: Iha Timor-Leste laiha “Labarik Dalan Ninin”

Dinorah Granadeiro hato’o kestaun ne’e relasiona ho komemorasaun Loron Mundiál ba Labarik Dalan Ninin (anak jalanan) sira ne’ebé mundu tomak selebra iha kada loron 31 fulan janeiru kada tinan.

“Ami-nia xefe departamentu peskiza informa ona ba ami katak to’o oras ne’e ita laiha labarik sira ne’ebé mak hela permanente iha dalan ninin. Ha’u atu dehan katak labarik  iha dalan ninin la signifika katak laiha maibé ita kategoria ne’e labarik sira laiha uma ka hela permanente iha dalan ninin ne’e ita seidauk iha. Ita iha de’it mak labarik ne’ebé mak fa’an sasán no família ladún tau atensaun ba sira,” Dinorah Granadeiro hateten ba Agência TATOLI iha nia knaar fatin, Caicoli, Dili, kuarta ne’e.

Liga ho polítika KNDL nian, nia dehan, iha 2019 bainhira selebra tinan 30 ba konvensaun direitu labarik nian, iha momentu ne’ebá lansa ona kampaña boot ida-ne’ebé mak liga ba asuntu “Labele sosa hosi labarik”.

Kampaña ne’e, nia esplika, hanesan polítika ne’ebé mak KNDL ho parseiru sira halo hodi redús partisipasaun labarik nian liuliu iha traballu infantil.

“Tanba ne’e, hosi 2020 mai to’o agora, ita sei kontinua hela ho kampaña ida-ne’e liuhosi programa sensibilizasaun ba  no autoridade sira atu iha konsiénsia katak labele uza labarik sira hodi kompleta nesesidade família  nian, tanba ne’e mak ami atraza no kontinua  hela. Tanba ida-ne’e planu ba tinan lima nian liuliu tanba situasaun hanesan ne’e liga ho sistuasaun sosiál,” nia dehan. 

Nia hateten, situasaun sosiál la’os esforsu hosi komisaun nian maibé tenke liga ho Ministériu lubuk ida-ne’ebé mak iha servisu prinsipál ho labarik sira hanesan Ministériu Edukasaun, Saúde, Polísia Nasionál Timor-Leste (PNTL) liuliu liga ba seguransa labarik nian inklui Sekretária Estadu Formsaun Profsionál no Empregu (SEFOPE) iha Dirasaun Komisaun Kontra Traballu Infantil nian.

Tuir nia, labarik sira-ne’ebé durante ne’e faan sasán iha dalan ninin no bazea sira-nia (KNDL) avaliasaun maiória hosi labarik sira-ne’e mesak eskola hotu. 

”Ha’u hakarak atu konfirma katak maiória labarik sira  iha dalan ninin, eskola hotu kedas. Sira halo servisu sira-ne’e bainhira tempu livre. Ami ko’alia, la halo peskiza maibé KNDL halo avaliasaun de’it. Atu dehan katak komisaun seidauk halo peskiza boot ida-ne’ebé mak atu responde ba labarik sira faan sasán iha dalan ninin ne’e. Maibé, KNDL halo avaliasaun kiik-oan atu ajuda komisaun dezempeña, planu liga ho polítiku saida mak komisaun bele halo atu responde ba situasaun sira. Tanba, ita-nia Komisaun Kontra Traballu Infatil sira mak halo peskiza ne’e,” nia dehan. 

Tanba ne’e, nia esplika, atu hatene definisaun loloos hosi labarik sira iha dalan ninin ne’e ba oin presiza konfirma ho definisaun hosi mundiál nian, tanba labarik iha dalan ninin loloos ne’e mak ida ne’ebé, labele tau fali interpretasaun ne’ebé mak la hanesan, nune’e labele kria fali polémika iha komunidade nia leet.

Notísia Relevante: Governu halo planu atu labarik sira labele halo servisu todan

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here