Xefe Programa no Polítika Peskiza ba KNDL, José Coreia da Peidade. Imajen TATOLI/Joanico de Araújo.

DILI, 01 fevereiru 2021 (TATOLI)—Governu liuhosi Komisaun Nasionál Direitu Labarik (KNDL), durante ne’e halo ona peskiza iha terrenu maibé seidauk identifika labarik sira-ne’ebé mak moris ka halo atividade iha dalan ninin iha sira-nia moris tomak.

Notísia Relevante: PA sei kria ekipa ida identifika labarik sira hosi RAEOA

Xefe Programa no Polítika Peskiza ba KNDL, José Coreia da Peidade, hateten labarik sira barak mak durante ne’e hala’o sira-nia movimentu iha dalan ninin hodi faan sasán ho atividade ne’ebé variedade maibé Timor-Leste seidauk iha labarik sira-ne’ebé babain ema bolu “labarik dalan ninin”.

Nia dehan, labarik ida-ne’ebé mak ajuda nia inan-aman iha oras ida-rua ne’e la’ós labarik dalan ninin tanba kondisaun ekonómia mak obriga sira tenke halo duni atividade iha dalan ninin hanesan faan sasán.

“Ha’u hakarak halo loos de’it katak iha Timor-Leste, labarik ida-ne’ebé mak ita konsidera labarik dalan ninin ne’e, ita Timor ema laiha. Ami bele hateten katak 100% labarik iha dalan ninin ne’e laiha. Ita tenke halo klaru katak labarik dalan ninin ne’e halo nia tempu tomak iha dalan ninin hanesan han, toba no halo atividade hotu-hotu iha dalan ninin. Ida-ne’e mak dehan labarik dalan ninin ka anak jalanan. Maibé, lae, ita Timor ida-ne’e seidauk iha labarik dalan ninin,” Xefe Programa no Polítika Peskiza ba KNDL, José Coreia da Peidade ba Agência TATOLI iha nia knaar fatin, Caicoli, Dili, segunda ne’e.

Xefe peskiza ne’e hateten, bainhira temi labarik dalan ninin iha ona mak nia impaktu sei ba esplorasaun ekonómiku nian. Maibé, nia dehan, iha Timor-Leste seidauk iha tanba dala barak labarik sira halo servisu forsadu sira de’it la’ós labarik dalan ninin ne’ebé moris iha dalan ninin.

Tuir nia, labarik sira ne’ebé halo servisu forsadu sira-ne’e tama iha kategoria ajuda inan-aman de’it tanba ekonómikamente inan-aman sira-nia rendimentu menus mak obriga labarik sira atu ajuda inan-aman hodi hetan lukru ruma ba apoiu inan-aman. 

Nia hateten, Governu rekoñese katak KNDL labele kontrola hotu atividade servisu ninian liuhosi kompañia sira-ne’ebé halo rekrutamentu, tanba ne’e KNDL presiza servisu hamutuk ho liña ministeriál hotu atu tau-matan hodi hakbiit ekonómia família.

“Loos! Iha labarik ida-rua mak halo servisu todan. Tanba ekonomia mak obriga tenke halo atividade iha dalan ninin,” nia rekuñese.

Maibé, nia informa, iha dadus loloos ne’ebé mak Komisaun Nasionál Direitu Labarik (KNDL) halibur mak labarik sira hamtuk na’in 70-resin. Hosi ema na’in 70-resin ne’e, tuir nia, maioria labarik estudante no barak mai hosi Rejiaun Administrativa Espesiál Oé-Cusse Ambeno (RAEOA).

“Ho ida-ne’e, ami halo aprosima ho labarik sira hosi RAEOA ne’ebé ami labele dehan dalan ninin. Maibé, labarik sira-ne’e barak família ka tiun sira bolu atu eskola maibé ikus mai labarik sira-nia tiun no tian sira utiliza labarik sira hodi faan modo, manu-tolun, no pentolan. Atividade faan sasán sira-ne’e labarik sira hala’o hodi aumenta ba rendimentu ka lukru ba sira-nia tiun no tian sira-ne’ebé mak hela iha Dili, tanba nia família ne’e mós dezempregu hela,” nia haktuir.

Ho kestaun hirak ne’e, nia hateten, presiza suporta hosi família no kompreensaun kona-ba protesaun ba labarik sira no respeita direitu labarik nian no komunidade sira tenke kria ambiente ida-ne’ebé di’ak.

“Ami rekuiñese kestaun ne’e tanba labarik bele halo movimentu tanba labarik sira iha ambiente ida-ne’ebé mak seguru. Ita-nia Estadu halo ona nia obrigasaun loke fasilidade sira, edukasaun no saúde gratuita inklui Estadu dada besik eskola ba iha suku sira,” nia esplika.

Iha konstituisaun RDTL artigu 18 (Protesaun ba labarik-oan sira) hateten (1) labarik sira iha direitu ba protesaun espesiál husi família, komunidade, no mós estadu, liuliu hasoru hahalok hotu hanesan la tau-matan, diskriminasaun, violénsia, opresaun, abuzu seksuál no esplorasaun; (2) Labarik sira hetan direitu hotu-hotu ne’ebé mundu rekoñese, hanesan direitu sira-ne’ebé hakerek ona iha konvensaun internasionál, ne’ebé Estadu aprova no simu ona ka ratifika fila-fila; no (3) Labarik hotu-hotu ne’ebé moris iha kazamentu nia laran ka lae, iha direitu hanesan kona-ba protesaun sosiál.

Bazea ba ida-ne’e mak iha mandatu VI Governu Konstitusionál lideradu hosi primeiru-Ministru Rui Maria Araújo lansa Planu Asaun Nasionál ba Labarik sira tinan 2016-2020, katak Governu Timor-Leste iha vontade atu kria ambiente ida-ne’ebé promove respeitu, protesaun no kumprimentu ba direitu umanu labarik feto no labarik mane sira-nian iha ita-nia nasaun, liuliu sira-ne’ebé maka moris iha situasaun susar no iha área remota no rurál sira.

Entretantu, iha Kodigu Ba Labarik liliu iha titulu IV kona-ba “Komisaun Nasionál ba Doreitu Labarik (KNDL) nian iha artigu 83 haktuir, KNDL hanesan entidade ne’ebé independente no auto-regulamentada ne’ebé hala’o nia funsaun prinsipál sira mak atu promove, defende no salvaguarda direitu labarik nian liuhosi alerta ba Governu ba situasaun ne’ebé afeta labarik no ninia direitu sira ne’ebé rekere atensaun espesiál ida no urjente.

Jornalista: Osória Marques

Editór: Cancio Ximenes

2 KOMENTÁRIU

  1. Konkorda ho director Komisaun direito labarik nb identifika katak iha Timor la iha labarik tane Liman iha dalam Ninin, parabens, bom trabalho com susesu, abra¢os

HAKEREK NO HATÁN

Please enter your comment!
Please enter your name here