Diretór Ezekutivu Estratejia Nasionál Empregu, Aniceto Leto Soro. Imajen TATOLI/Joanico de Araújo.

DILI, 01 fevereiru 2021 (TATOLI)—Diretór Ezekutivu Estratejia Nasionál Empregu, Aniceto Leto Soro, hateten Governu liuhosi Komisaun Nasionál Kontra Traballu Infantil (CNCTI-sigla portugés) hahú halo planu asaun ba traballu infantil iha Timor-Leste.

Notísia Relevante:  Iha Timor-Leste laiha “Labarik Dalan Ninin”

“Ita hahú halo planu no polítika ba traballu infantil para elimina atu labarik sira labele halo servisu todan no tenke hala’o sira-nia estudu,” Aniceto Leto Soro hateten ba Agência TATOLI iha nia knaar fatin, Caicoli, Dili, segunda ne’e.

Nia hatutan, medida ne’ebé Governu atu uza mak presiza halo lei ida hodi garante servisu iha terrenu no lei ida-ne’ebé bandu atu labarik ida labele halo servisu todan. Tanba ne’e, SEFOPE liuhosi CNCTI elobora ona lista atividade espesifikamente ne’ebé sei aplika ba lei ka proposta lei.

“Iha ita-nia lei traballu ne’ebé hatuur ona ba buat ne’ebé bandu labarik. Maibé iha ne’ebá, seidauk iha espesifikamente katak bandu ne’e iha área ne’ebé. Iha setór saida mak bele bandu. Entaun, ita presiza halo lista perigozu ida katak atividade ida-ne’ebé mak sei fó risku ba labarik minoridade sira hosi idade 17 mai kraik labele halo servisu,” nia esplika.

Nia hateten, proposta lei refere iha ona esbosu no CNCTI aprezenta ona ba Ministériu Koordenadór Asuntu Ekonómiku (MKAE) hodi nune’e MKAE bele lori ba Konsellu Ministru atu bele hetan aprovasaun. Bainhira lei ne’e loos ona mak sei presiza halo planu asaun kontra traballu infantile ne’ebé daudaun ne’e CNCTI elabora ona.

“Planu asaun nasionál kontra traballu infantil ita elabora tiha ona no halo ona diskusaun. Depois ita finaliza ona diskusaun ne’e iha fulan novembru no dezembru tinan kotuk. Ita hein bainhira mak Konsellu Ministru aprova,” nia dehan.

Tanba, tuir nia, esbosuu lei ne’e sei hanesan guia ida ba SEFOPE no espesaun traballu hodi nune’e CNCTI utiliza para halo servisu.  Lei iha ona no hein katak MKAE bele aselera no aprezenta ba Konsellu Ministru, nune’e bele ajuda labarik sira-nia servisu.

Maske seidauk iha lei ne’ebé atu garante ba CNCTI hodi halo peskiza, maibé nia dehan, peskiza ne’e atu fó konfiansa ba Governu liuliu ba membru Governu sira no Konsellu Ministru hodi hatudu katak Timor ne’e iha duni traballu infantil.

Entretantu, nia informa, peskiza ba labarik traballu infantil sira iha territóriu Timor-Leste iha 2016 hamutuk ema na’in-421. Hosi númeru ne’e, 60% labarik eskola totalmente la halo servisu maibé restu hosi ne’e mak halo traballu infantil hodi ajuda sira-nia inan-aman.

Diretór ne’e hateten, iha 13,2% mak Komisaun Nasionál Kontra Traballu Infantil kategória ba servisu traballu infantil nian no 12% mak la kategória ba traballu infantil maibé ba sira-ne’ebé servisu kmaan nian.

Nia dehan, iha 12% mak parte Komisaun Nasionál Kontra Traballu Infantil konsidera servisu ne’ebé mak permitidu, katak servisu ne’ebé labarik halo la prejudika ba labarik nia eskola no saúde. Ba 13% ne’e, servisu ne’ebé konsidera prejudika ba labarik sira-nia edukasaun no saúde inklui morál.

Tanba ne’e, nia dehan, Governu tau prioridade liu ba traballu infantil atu oinsá mak lori labarik ne’ebé mak iha perigu nia-laran ne’e hodi bele asesu ba eskola. Tanba realidade hatudu katak bazea ba rezultadu preskiza ne’ebé halo liuliu iha traballu infantil iha 2016 ne’e, labarik lubuk ida mak halo atividade ekonómiku família iha rai laran liuliu atu ajuda família moris iha vulnerável.

“Entaun, ho situasaun ida-ne’e halo Governu atu oinsá kria polítika ne’ebé mak klaru no medida adekuadu nune’e bele proteje alin sira,” nia hateten.

Nia haktuir, ho dadus hirak ne’e bele justifika no aprezenta planu asaun nasionál kontra traballu infantil tanba dala ruma Governu la aprova tanba hatete katak Timor laiha traballu infantil.

“Tanba ne’e mka ita aprezenta ho rezultadu dadus peskiza hodi bele fó konfiansa no justifikasun ne’ebé mak iha hodi haforsa no aselera prosesu sira hotu,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here