Imajen/Media PN.

DILI, 02 fevereiru 2021 (TATOLI)—Parlamentu Nasionál, ohin, halo ona ratifikasaun ba Konvensaun Nova -Iorke 1958 kona-ba rekoñesimentu no ezekusaun sentensa arbitrál estranjeira nune’e Repúblika Demokrátika Timor-Leste adere ba konvensaun refere maibé iha ámbitu komersializasaun de’it.

Notísia Relevante: PN sei diskute proposta-rezolusaun rekoñesimentu no ezekusaun sentensa arbitrál estranjeira

Proposta-rezolusaun Númeru 3/V (2ª) kona-ba adezaun Timor-Leste nian aprovadu ho rezultadu votasaun a-favór 31, kontra 0 no abstensaun 3.

“Ho nune’e proposta-rezolusaun ne’e pasa ho votu maioria,” Prezidente Parlamentu Nasionál Ein-Ezersísiu atuál Vise-Prezidente Parlamentu Nasionál, Deputada Maria Angelina Lopes Sarmento, anunsia liuhosi plenária Parlamentu Nasionál Parlamentu Nasionál, tersa ne’e.

Entretantu, Deputadu sira hosi Bankada CNRT deside lakohi partisipa iha prosesu votasaun ba proposta-rezolusaun refere.

Ministru Prezidénsia Konsellu Ministru, Fidelis Manuel Leite Magalhães, esplika konvensaun ne’e ba de’it área komersializasaun.

Nia fó ezemplu, sidadaun timoroan ida disputa komesiál ho sidadaun Afganistaun maibé Afganistaun la hola-parte iha konvensaun ne’e, bainhira sira na’in-rua lori disputa ne’e ba iha Tribunál arbitrajen Singapura no desizaun tún husu sidadaun timoroan ne’e tenke selu.

“Depois timoroan ne’e fila tiha no lakohi selu ona maske iha inisiu voluntariamente nia hola-parte. Saida mak akontese sidadaun Afganistaun ne’e mai tuir (Timor-Leste) atu lori timoroan ne’ebé halai sai hosi responsabilidade ne’e tuir justisa ita-nian, maibé justisa ita-nian sei rezeita tanba Estadu Afganistaun la hola-parte iha konvensaun ne’e,” Ministru Fidelis hateten.

Ho nune’e, Ministru Prezidénsia Konsellu Ministru ne’e afirma, nasaun hotu-hotu ne’ebé hola-parte Timor-Leste rekoñese bainhira hasoru kazu komersiál ruma maibé nasaun ne’ebé la hola parte Timor-Leste sei la rekoñese.

Prezidente Komisaun A (Justisa no Konstitusionál), Deputadu Joaquim dos Santos “Boraluli”, esplika rekoñesimentu no ezekusaun sentensa abritrál estranjeiru ne’e importante ba Timor-Leste.

Konvensaun rekoñesimentu no ezekusaun sentensa abritrál estranjeira ne’e selebrada iha Nova Iorke, iha loron 10 juñu 1985. Iha konvensaun vigora ho versaun inglés, xinés, españa, francês no Rússia ne’ebé sai ona arkivu Organizasaun Nasaun Unida (ONU) nian.

Konvensaun rekoñesimentu no ezekusaun sentensa arbitrál estranjeira importante ba Timor-Leste.

Ezisténsia konvensaun ne’e atu regula dispozisaun legál sira hotu tanba importante liu iha sosiedade kona-ba moris no asegura protesaun legál ba parte sira-ne’ebé iha relasaun jurídika, inklui relasaun jurídika atividade ekonómika nian.

Proposta-rezolusaun ne’e aprezenta hosi Ministériu Negósiu Estranjeiru no Kooperasaun (MNEK).

Notísia Relevante: Governu-PN hahú diskute adezaun konvensaun Nova Iorke sentensa arbitrál estranjeiru

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here