Mapamentu país 160 ne’ebé adere ona ba Konvensaun Nova Iorke kona-ba ezekusaun sentensa arbitrál estranjeiru sira. Imajen/newyorkconvention

DILI, 25 janeiru 2021 (TATOLI)--Governu no Parlamentu Nasionál (PN) hahú halo diskusaun  adezaun Timor-Leste ba Konvensaun Nova Iorke 1958 kona-ba rekoñesimentu no ezekusaun sentensa arbitrál  estranjeiru sira.

Diskusaun ne’e partisipa hosi Ministru Prezidénsia Konsellu Ministru, Fidelis Manuel Leite Magalhães, Ministru Justisa, Manuel Cárceres da Costa no Vise-Ministru Negósiu Estranjeiru no Kooperasaun, Julião da Silva, partisipa iha debate, foin lalais iha PN, ho Komisaun Asuntu Konstitusionál  no Justisa (Komisaun A) no Komisaun Negósiu Estranjeiru, Defeza no Seguransa (Komisaun B).

Iha diskusaun ne’e, governante sira esklarese kestaun sira ne’ebé mosu hosi Deputadu Komisaun Parlamentár sira no defende importánsia adezaun Timor-Leste ba konvensaun ne’e, tanba konstitui insentivu importante ida atu intensifika relasaun komersiál sira ho esteriór no fatór atu promove investimentu estranjeiru.

Konvensaun ne’e hetan ona ratifikasaun hosi nasaun 160 resin no konsidera hanesan akordu multilaterál importante liu hotu iha ámbitu Direitu Arbitrál Internasionál.

“Konvensaun Nova Iorke aplika rekoñesimentu no ezekusaun sentensa arbitrál sira ne’ebé fó sai iha territóriu Estadu ne’ebé la hanesan, ho Estadu ne’ebé ema husu rekoñesimentu no ezekusaun sentensa, no  mai hosi litíjiu sira entre ema singulár ka koletiva sira,” refere nota impresa ne’ebé Agência TATOLI asesu, segunda ne’e.

Konvensaun mós aplika ba sentensa arbitrál sira ne’ebé la konsidera hanesan sentensa nasionál iha Estadu ne’ebé ema husu ninia rekoñesimentu no ezekusaun arbitrajen nu’udar métodu alternativu ida, ne’ebé la hanesan ho sistema judisiáriu regulár, ba rezolusaun konflitu entre parte sira.

“Parte sira iha konflitu konkorda katak problema ne’e bele rezolve liuhosi árbitru ne’ebé sira mak indika, no mós konkorda katak desizaun finál sei vínkula parte sira no iha forsa ezekutiva hanesan hosi desizaun tribunál judisiál sira,” esplika nota hosi ezekutivu.

Vantajen prinsipál ida arbitrajen nian maka halo rezolusaun lalais ba kazu no kompeténsia hosi ema sira ne’ebé deside litíjiu, bainhira haree ba kompleksidade no espesifisidade tema balun ne’ebé sei analiza hela.

Tanba tuir regra internasionál balun, ne’ebé permite rezolusaun ba konflitu sira ho lalais no tanba iha karater vinkulativu ida kona-ba desizaun, karaterístika hotu-hotu ne’e haforsa konfiansa hosi parseiru esternu sira no bele hamenus impedimentu sira ba nia investimentu iha país.

Hosi parte PN sei analiza hela inisiativa lejizlativa rua ne’ebé submete ona hosi Governu kona-ba Rejime Jurídiku Arbitrajen Voluntária no ba Autorizasaun Lejizlativa nian atu halo alterasaun iha Kódigu Prosesu Sivíl, ne’ebé ho objetivu prinsipál atu hadi’a ambiente negósiu sira no reforsa seguransa jurídika hosi tranzasaun komersiál no kumprimentu kontratu sira.

Adezaun Timor-Leste ba konvensaun ne’e, hamutuk ho proposta-lei rua, enkuadra ona iha prosesu atu hadi’a prestasaun justisa iha Programa Reforma Administrasaun Públika, ne’ebé ninia objetivu mak atu kria solusaun estrajudisiál sira ba rezolusaun konflitu kontratuál sira entre privadu sira.

Nune’e mós, entre privadu no Estadu, kona-ba kontratu sira ho natureza privada hodi simplifika no fó ajilidade boot liután iha rezolusaun judisiál ba konflitu sira ho natureza komersiál.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here