Plenária Parlamento Nasionál. Imajen TATOLI/Egas Cristovão.

DILI, 29 janeiru 2021–Parlamentu Nasionál (PN) sei diskute proposta-rezolusaun kona-ba rekoñesimentu no ezekusaun sentensa arbitrál estranjeira iha fulan-fevereiru.

Notísia Relevante: Komisaun A aprova paresér proposta-rezolusaun ezekusaun sentensa arbitrál estranjeira

“Iha loron 02 fevereiru sei halo diskusaun no votasaun ba proposta-rezolusaun kona-ba adezaun Timor-Leste nian konvensaun Nova Iorke, relasiona ho rekoñesimentu no ezekusaun sentensa arbitrál estranjeira,” Sekretária Meza Parlamentu Nasionál, Deputada Lídia dos Santos Martins, informa liuhosi konferénsia imprensa iha Parlamentu Nasionál, sesta ne’e.

Relatóriu no paresér ne’e aprova hosi Komisaun A (Justisa no Konstitusionál) iha loron kinta, 21 janeiru 2021.

Prezidente Komisaun A (Justisa no Konstitusionál), Deputadu Joaquim dos Santos “Boraluli” esplika  rekoñesimentu no ezekusaun sentensa abritrál estranjeiru ne’e importante ba Timor-Leste.

Konvensaun rekoñesimentu no ezekusaun sentensa abritrál estranjeira ne’e selebrada iha Nova Iorke, iha loron 10 juñu 1985. Iha konvensaun vigora ho versaun inglés, xinés, españa, francês no Rúsia ne’ebé sai ona arkivu Organizasaun Nasaun Unida (ONU) nian.

Konvensaun rekoñesimentu no ezekusaun sentensa arbitrál estranjeira importante ba Timor-Leste.

Ezisténsia konvensaun ne’e atu regula dispozisaun legál sira hotu tanba importante liu iha sosiedade kona-ba moris no asegura protesaun legál ba parte sira-ne’ebé iha relasaun jurídika, inklui relasaun jurídika atividade ekonómika nian.

Proposta-rezolusaun ne’e aprezenta hosi Ministériu Negósiu Estranjeiru no Kooperasaun (MNEK).

Notísia Relevante: Governu-PN hahú diskute adezaun konvensaun Nova Iorke sentensa arbitrál estranjeiru

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here