Jogadór nasionalidade Indonézia, Ferdinad Sinaga. Imajen/Espesiál

DILI, 02 fevreiru 2021 (TATOLI) – Jogadór prinsipál klube PSM Makasar, Indonézia, Ferdinand Sinaga, ofisialmente asina ona kontratu ho klube primeira divizaun Timor-Leste Boavista FC Timor, foin lalais ne’e.

Kontratu ne’ebé Boavista haraik ba jogadór estranjeiru ho nasionalidade Indonézia ne’e durasaun fulan-11 hodi reforsa Boavista FC Timor durante époka 2021.

Notísia Relevante : Boavista FC Timor rekruta jogadór foun na’in-sia

Jerente Boavista FC Timor, Ezzy Leong hateten, jogadór ne’e sei mai Timor-Leste iha tempu besik tanba asina ona kontratu.

“Agora ami hatama ona karta ba Ministériu Negósiu Estranjeiru no Ministériu Saúde, hodi fó autorizasaun jogadór ne’e bele mai iha fevreiru nia laran, maibé depende de’it ba resposta hosi MNEK ho MS,” Ezzy Leong informa ba Agência TATOLI iha nia hela fatin, Bairru Sentrál, Dili, tersa ne’e..

Kona-ba presu kontratu ho jogadór ne’e, Ezzy Leong,  la bele publika tanba parte sira konsidera sijilu.

Ferdinand Sinaga moris iha Bengkulu, Indonézia, iha loron 18 setembru 1988 ho nia esperiénsia joga iha klube sira Indonézia mak hanesan;

Tinan Klube Hatama (Golu)
2006–2007 Persibat Batang 14 (2)
2007–2008 Persikab Bandung 8 (1)
2008–2009 Pelita Jaya 4 (0)
2009–2010 PPSM Sakti Magelang 20 (5)
2010–2011 Persiwa Wamena 26 (10)
2011–2012 Semen Padang 25 (16)
2012–2013 Persisam Putra Samarinda 18 (10)
2013–2014 Persib Bandung 23 (11)
2014–2015 Sriwijaya F.C. 3 (1)
2016–2017 PSM Makassar 57 (22)
2018 Kelantan 5 (0)
2018– PSM Makassar 60 (22)
2020– → PSMS Medan (empresta) 0 (0)

Bainhira joga iha klube hirak ne’e, Ferdinand Sinaga mós iha tinan 2009-2011 hanesan jogadór selesaun nasionál Indonézia.

Hosi esperiénsia hirak ne’ebé jogadór ne’e iha bele lori konfiansa ba Boavista FC Timor hodi atinje sira-nia mehi boot sai kampiaun Liga Futeból Timor-Leste (LFTL) 2021.

Notísia Relevante : Heineken hakarak sai patrosinadór ba Boavista FC Timor

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here