Jogadór Boavista FC Timor, hafoin hatama golu ba guarda rede Assalam FC bainhira joga iha Tasa 12 Novembru 2020 iha Estadiu Munisipál Dili. Imajen Tatoli/António Gonçalves

DILI, 23 janeiru 2021 (TATOLI) – Kada époka klube hotu iha primeira divizaun no segunda divizaun Liga Futeból Timor-Leste (LFTL) komesa hadau malu kontrata ho jogadór lokál no internasionál hodi reforsa klube ida-idak iha liga no tasa 12 Novembru.

Jornada janela transferénsia, tinan ne’e,   Boavista FC Timor (BFCT) iha ambisaun boot hakarak marka istória dala-ida tan hodi sai kampiaun ba LFTL hanesan 2018. Nune’e klube ne’e rekruta ona jogadór foun hamutuk na’in-sia.

“Agora Boavista iha jogadór foun na’in-sia, sosa hosi klube SLB mak Mozinho, Jhon Frith no Bakayoko, hosi DIT ami sosa mak jogadór Ricky mai hanesan guarda rede, FC Porto Taibessi mak, Lazio, Armindo Anggisu no hosi Lalenok mak Yohanes. Sira-ne’e mak agora asina ona kontratu.”   Haktuir komunikadu imprensa hosi Boavista FC Timor nian ne’ebé Agéncia TATOLI asesu, sábadu ne’e.

Boavista mós sei halo negosia hela ho jogadór estranjeiru tolu tan hodi reforsa klube ne’e hodi hetan títulu hanesan kampiaun.

Klube refere komunika ona ho treinadór internasionál hosi Xile, Eladio Rozas, ne’ebé  iha 2018 hamutuk ho Boavista lori Boavista sai kampiaun Liga Futeból Amadora (LFA) no supertasa iha momentu ne’ebá.

Iha parte seluk Boavista mós husik ona nia jogadór na’in-rua hanesan Gaudencio no Henrique Martins.

Henrique Martins, informa ba Agéncia TATOLI katak  Boavista FC Timor bolu duni nia hodi ko’alia maibé kontratu mak la kona-malu.

“Boavista bolu duni ami ba ko’alia, maibé kontratu mak la kona-malu, entaun ha’u deside fokus ba hadi’a ha’u nia saúde no ain ne’ebé aleija hela ne’e para klube balu presiza fali ha’u prontu joga,” Ricky liuhosi komunikasaun WhatsApp.

Henrique hanesan jogadór selesaun nasionál senior ne’ebé lori ona Timor-Leste sai kampiaun ba tasa Hassanal Bolkiah iha 2018 hafoin halakon Cambodia ho golu úniku ne’ebé hatama hosi nia rasik.

Jornalista   : Hortencio Sanchez

Editór        : Francisco Simões

 

HAKEREK NO HATÁN

Please enter your comment!
Please enter your name here