Prezidente Boavista FC Timor, Ramos Horta hamutuk ho estrutura halo enkontru ho Heineken Timor-Leste. Imajen Tatoli/Hortencia Sanchez

DILI, 28 janeiru 2021 (TATOLI) – Kompañia Heineken iha Timor – Leste hala’o sorumutuk ho Prezidente klube Boavista FC Timor, José Ramos Horta no estrutura klube nian hodi ko’alia kona-ba intensaun Heineken nian atu sai patrosinadór durante tinan tolu ba Boavista FC Timor.

Prezidente klube Boavista FC Timor, Ramos Horta hateten, époka ida ne’e Boavista hakarak kompete maka’as nune’e buka parseiru hodi reforsa iha finanseiru no seluk tan.

“Heineken seidauk halo kompromisu  definitivu atu apoiu Boavista, maibé ami buka nafatin Heineken nia apoiu ho kompañia sira seluk hodi apoiu ami,” Ramos Horta informa ba jornalista iha nia rezidénsia Metiaut, Dili, kinta ne’e.

Iha Timor-Leste, Ramos Horta hateten, ema barak gosta desportu liuliu futeból tanba ne’e Boavista sei hatudu jogu ne’ebé di’ak liuhosi suporta hosi patrosinadór sira.

Iha fatin hanesan, jestór  Heineken iha Timor -Leste, Ana Guterres hateten, Heineken la’ós atu prodús de’it serveja, maibé iha mós responsabilidade ba sosiedade no komunidade sira.

“Ami hakarak tebes atu promove atividade desportu. Entaun ami ko’alia ho Boavista hakarak atu hatene sira-nia planu no ami sei ajuda sira hodi promove sira-nia klube no ajuda desportu iha nasaun ne’e,” Ana Guterres hateten.

Kona-ba apoiu Heineken sei haree tanba foin iha faze diskusaun hodi hein proposta hosi Boavista hafoin ajuda finansiamentu.

Otimista Boavista kampiaun LFTL 2021

Prezidente Boavista FC Timor, José Ramos Horta hateten, époka ne’e oportunidade boot ba Boavista mak sei sai kampiaun ba Liga Futeból Timor-Leste (LFTL) tanba iha preparasaun ne’ebé di’ak.

Nia husu ba klube seluk hanesan Lalenok, Karketu no seluk tan labele ambisaun demais tanba tasa iha ona Boavista nia liman.

“Tinan ida ne’e ami prepara maka’as loos, ne’ebé husu ba Karketu, Lalenok di’ak liu ba hela de’it iha uma lalika lakon tempu tanba ami sei manan sira hotu ne’e fasil loos,” Horta hateten.

Nia dehan, Boavista iha ambisaun maka’as tanba daudaun ne’e rekruta ona jogadór mesak brillante no naran boot iha klube sira iha Timor – Leste no estranjeiru.

Boavista halo negosiasaun ona ho jogadór estrela PSM Makasar, Ferdinad Sinaga ne’ebé naran boot iha liga Indonézia nian.

Boavista mós rekruta ona jogadór estrela iha klube Timor-Leste nian hanesan Mozinho de Lima ne’ebé durante ne’e sai “sniper” ba AD. SLB Laulara.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here