Prezidente Komisan A PB, Deputadu bankada Fretilin, Joaquim dos Santos. Imajen/Egas Cristovão

DILI, 22 janeiru 2002–Komisaun A (Justisa no Konstitusionál) aprova ona relatóriu no paresér proposta-rezolusaun kona-ba rekoñesimentu no ezekusaun sentensa arbitrál estranjeira.

Relatóriu no paresér ne’e aprova hosi Komisaun A iha loron kinta, 21 janeiru 2021.

“Ami aprova ona relatóriu no paresér kona-ba proposta-rezolusaun kona-ba rekoñesimentu no ezekusaun sentensa arbitrál estranjeira. Tanba ita presiza norma ida tán hodi adere Konvensaun Nova Iorke ne’e, ita kuandu adere ona bele ajuda rezolve ita iha estranjeiru no iha rai laran iha área komersializasaun nian,” Prezidente Komisaun A, Deputadu Joaquim dos Santos “Boraluli”, esplika ba jornalista sira iha resintu Parlamentu Nasionál, sesta ne’e.

Prezidente Komisaunn A ne’e aprezenta ona paresér ba meza prezidénsia hodi halo ajendamentu nune’e bele hahú debate iha faze jeneralidade.

Nia dehan, bainhira Parlamentu Nasionál aprova ona proposta-rezolusaun ne’e ajuda Governu harii sentru arbitrajen voluntária iha Timor-Leste no bele ajuda sistema judisiáriu atu rezolve disputa komersiál nasionál no internasionál sira.

Tuir nia, rekoñesimentu no ezekusaun sentensa abritrál estranjeiru ne’e importante ba Timor-Leste.

Konvensaun rekoñesimentu no ezekusaun sentensa abritrál estranjeira ne’e selebrada iha Nova Iorke, iha loron 10 juñu 1985. Iha konvensaun vigora ho versaun inglés, xinés, españa, francês no Rússia ne’ebé sai ona arkivu Organizasaun Nasaun Unida (ONU) nian.

Konvensaun rekoñesimentu no ezekusaun sentensa arbitrál estranjeira importante ba Timor-Leste.

Ezisténsia konvensaun ne’e atu regula dispozisaun legál sira hotu tanba importante liu iha sosiedade kona-ba moris no asegura protesaun legál ba parte sira-ne’ebé iha relasaun jurídika, inklui relasaun jurídika atividade ekonómika nian.

Proposta-rezolusaun ne’e aprezenta hosi Ministériu Negósiu Estranjeiru no Kooperasaun (MNEK).

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here