Bankada CNRT reafirma Kay Rala Xanana Gusmão nu'udar Prezidente CPN mak sei hatán iha tribunal hodi hasoru Sekretáriu Jerál FRETILIN Mari Alkatiri. Imajen TATOLI/Evaristo Soares Martins.

DILI, 27 janeiru 2021 (TATOLI)–Bankada Congresso Nacional de Reconstrução de Timorensse (CNRT) reafirma Kay Rala Xanana Gusmão nu’udar Prezidente CPN mak sei hatán iha tribunál kona-ba keixa ne’ebé hato’o hosi Sekretáriu Jerál FRETILIN Mari Alkatiri ba Ministériu Públika. 

Notísia Relevante: Francisco Branco: “Alkatiri la’ós keixa Xanana Gusmão”

Bankada CNRT hakarak halo Konferénsia Imprensa ida ne’e atuesplika kestaun balun ne’ebé Bankada FRETILIN fó sai iha sira-nia komunikadu imprensa hodi manifesta sira-nia pániku bainhira rona Prezidente Partidu CNRT Kay Rala Xanana Gusmão mak sei hatán ba Mari Alkatiri nia keixa.

“CPN ka Comissão Política Nacional ne’e órgaun koletivu ida-ne’ebé lidera hosi Prezidente Partidu CNRT, Kay Rala Xanana Gusmão. Tanba-ne’e, Prezidente Partidu ne’ebé mós nu’udar Prezidente CPN iha obrigasaun atu responsabiliza ba desizaun no asaun ne’ebé CPN foti hodi hasoru Mari Alkatiri,” Reprezentante Bankada CNRT, Deputdu Leandro Lobato, informa liuhosi konferénsia imprensa iha sala bankada CNRT, Parlamentu Nasionál, kuarta ne’e.

Bankada CNRT haktuir desizaun ne’e la’ós foti naran-naran maibé foti liuhosi deliberasaun reuniaun CPN nian ne’ebé prezide hosi Prezidente CPN-CNRT Kay Rala Xanana Gusmão.

Konferénsia Imprensa ne’ebé akompaña hosi Vise-Xefe Bankada CNRT, Deputadu Patrocínio Fernandes dos Reis, fundamenta CPN-CNRT hanesan órgaun koletivu iha nia lider másimu atu responsabiliza ba nia asaun sira.

“Mari Alkatiri hato’o keixa ba Ministériu Públiku hasoru CPN-CNRT, signifika katak líder másimu hosi órgaun CPN-CNRT mak sei responsabiliza. Tanba-ne’e maka CPN-CNRT bolu atensaun ba públiku katak Prezidente CPN-CNRT mak sei hatán ba akuzasaun hosi Mari Alkatiri,” Bankada CNRT haktuir.

Bankada CNRT argumenta, konferénsia imprensa ne’ebé halo iha Sede Partidu CNRT ne’e hosi CPN-CNRT rasik no halo tuir deliberasaun reuniaun CPN nian.

“CPN-CNRT la-halo akuzasaun direta hasoru Mari Alkatiri relasiona ho subornu ne’ebé Mari Alkatiri simu hosi kompañia Conoco Phillips, maibé CPN-CNRT liuhosi divulga dokumentu legál ne’ebé aprezenta hosi Oceanic Exploration hasoru ConocoPhillips, ne’ebé mensiona subornu Millaun $2.5 ba Mari Alkatiri durante negosiasaun ba Tratadu Tasi Timor 2002/2003,” hateten Bankada CNRT.

CPN-CNRT la politiza justisa maibé pelu kontráriu, públiku tomak akompaña hela sé loos mak oras ne’e daudaun politiza hela setór justisa ba interese partidária nian.

Iha konferénsia imprensa ne’e partisipa hosi Deputadu Arão Noé de Jesus da Costa Amaral, Deputada Carmelita Caetano Moniz no sira seluk.

Notísia Relevante: Reuniaun Estraodinária CPN-CNRT, deside Xanana mak hatán iha Tribunál

Jornalista: Evaristo Sores Martins

Editór: Cancio Ximenes

HAKEREK NO HATÁN

Please enter your comment!
Please enter your name here