Deputadu Bankada FRETILIN, Francisco Miranda Branco. Imajen Tatoli/Jogerjo Guterres

DILI, 26 janeiru 2021 (TATOLI)–Bankada FRETILIN lideradu Deputadu Francisco Miranda Branco, hasai deklarasaun ida katak Sekretáriu Jerál FRETILIN, Mari Alkatiri hato’o keixa ba Ministériu Públiku (MP) la’ós keixa Kay Rala Xanana Gusmão.

Notísia Relevante: Reuniaun Estraodinária CPN-CNRT, deside Xanana mak hatán iha Tribunál

Liuhosi komunikadu imprensa ne’ebé Agência TATOLI asesu, ohin, Bankada FRETILIN esklarese ba públiku no hatán ba membru CPN partidu CNRT nian katak ne’ebé buka distorse opiniaun públika no nafatin halo tentativa atu interven iha justisa.

Bankada FRETILIN haktuir, Mari Alkatiri aprezenta keixa ba Ministério Públiku iha loron 07 jullu 2020, hasoru individu balun ne’ebé mós nu’udar membru Komisaun Polítika Nasional partidu CNRT nian, ne’ebé halo akuzasaun katak eis Primeiru-Ministru Mari Alkatiri simu subornu hosi empreza internasionál ida.

Bankada FRETILIN konsidera akuzasaun ida-ne’e indevida no ho objetivu atu halo fo’er Mari Alkatiri nia naran, nia dignidade no reputasaun.

Bankada FRETILI kondena tebes atitude “suspeitos” sira ba kazu refere, bainhira inventa reuniaun CPN estra-ordinária ida atu deside fali Xanana Gusmão mak atu hatán ihá tribunal ne’e hahalok ida infantil no irresponsável.

“Xanana Gusmão la’ós parte lejítima ba prosesu ida-ne’e. Tanba ida-ne’e, prosesu justisa. Mari Alkatiri la halo akuzasaun kontra Xanana Gusmão no Ministériu Públiku la’ós notifika Xanana Gusmão, maibé notifika individu balun ne’ebé mós nu’udar membru CPN partidu CNRT,” Bankada FRETILIN hateten.

Bankada FRETILIN fundamenta, responsabilidade kriminál ne’e individuál no intransmisivel, tuir kódigu penal artigu 12 ema ida-idak hatán ba nia hahálok krime no labele soe fali nia responsabilidade kriminál ba ema seluk.

“Ita labele halo tentativa politiza justisa. Polítika ihá nia fatin no justisa iha nia fatin. Tribunál la’ós fatin atu hasoru malu maibé atu ba hasoru justisa. Kazu ida-ne’e sidadaun sira atu ba hatán justisa no la inklui Xanana Gusmão,” Bankada FRETILIN lideradu Francisco Miranda Branco hateten.

Bankada FRETILIN afirma, Mari Alkatiri aprezenta hanoin atu halo debate polítiku públiku ho Xanana Gusmão maibé laiha resposta. Atu hasoru malu karik ihá debate polítiku públiku, la ós atu hasoru malu fali ihá tribunál.

Komunikadu ne’e esplika, Ministériu Públiku mak na’in ba asaun penál, prosesu instaura ona no sei tama ihá investigasaun, bainhira iha ona prova krime prosesu ba ona Tribunál.

“Suspeitu sira sai arguidu reprezenta hosi sira-nia mandatáriu no Ministériu Públiku mak reprezenta lezadu,” Bankada FRETILIN fundamenta.

Tanba ne’e mak responsabilidade kriminal ne’e individuál no intransmisivel, arguidu sira bele hetan pena prizaun no/ka multa.

Bankada FRETILIN apela ba sidadaun hotu, organizasaun no partidu polítiku sira husik justisa halo servisu.

“Labele interven beibeik no politiza justisa, polítika iha nia fatin, justisa iha nia fatin,” Bankada FRETILIN argumenta.

Bankada FRETILIN hasai deklarasaun ne’e hodi hatán ba reuniun estraordinária Partidu CNRT nian, ne’ebé deside ona Prezidente Partidu CNRT, Kay Rala Xanana Gusmão mak sei ba hatán iha Tribunál.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here