Komisaun Polítika Nasionál Partidu Congresso Nacionál de Reconstrução de Timorense (CPN-CNRT) hala’o konferénsia imprensa hodi hato’o rezultadu estraordinária ne’ebé Kay Rala Xanana Gusmão ba hatán iha tribunal relasiona ho Sekretáriu Jerál FRETILIN Mari Alkatiri ne'ebé hato'o ona keixa ba iha Ministériu Públiku. Imajen TATOLI/Domingos Piedade Freitas.

DILI, 23 janeiru 2021 (TATOLI)–Reuniaun estraordinária hosi Komisaun Polítika Nasionál Partidu Congresso Nacionál de Reconstrução de Timorense (CPN-CNRT, deside Kay Rala Xanana Gusmão mak hatán iha Tribunál relasiona ho Sekretáriu Jerál FRETILIN Mari Alkatiri ne’ebé hato’o ona keixa ba iha Ministériu Públiku.

Notísia Relavante: Kona-ba Alkatiri nia keixa, MP sei notifika CPN-CNRT

Vise-Prezidente Komisaun Polítika Nacional (CPN) hosi Partidu Congresso Nacional de Reconstrução de Timorense (CNRT), Virgílio Smith, lamenta tebes ho deklarasaun Sekretáriu Jerál FRETILIN ne’ebe nia hasai molok sai husi Ministériu Públiku.

Virgílio Smith husu ba Ministériu Públiku atu komprende katak CPN hosi partidu CNRT, órgaun koletivu no iha desizaun hotu-hotu, sé mak responsável liu mak Prezidente CPN, Kay Rala Xanana Gusmão.

Nia hatutan, bankada parlamentár CNRT implementa polítika hosi Partidu CNRT, liuhosi programa sira-ne’ebé hasai iha kongresu no mós implementa desizaun hosi órgaun másimu partidu nian mak Komisaun Polítika Nasionál.

“Iha kazu ida-ne’e, CPN hasai desizaun katak Prezidente CPN, Kay Rala Xanana Gusmão, mak tenke ba hatán nu’udar arguidu iha Tribunál,” Virgílio Smith informa liuhosi konferénsia imprensa, iha sede CNRT, Bairro dos Grilhos, Dili, sábadu ne’e.

Virgílio esplika, membru CPN sira seluk no deputadu 21 hosi bankada parlamentár CNRT iha Parlamentu Nasionál, sei uza mak sira-nia direitu ba silénsiu tuir artigu 60º, alinea c iha Kódigu Prosesu Penál.

Ikus liu membru CPN ne’ebé hola iha reuniaun estraordinária ida-ne’e mak Kay Rala Xanana Gusmão nu’udar Prezidente partidu CNRT.

Nune’e mós Prezidente CPN, Vise-Prezidente CPN, Virgílio Smith, membru sira mak hanesan Tomás do Rosario Cabral, Bendito Freitas, Francisco da Costa, Jacinto Rigoberto, Francisco Costa Guterres no Jacinto Viegas Roque.

Notísia Relavante: Marí Alkatiri Hato’o Ona Keixa Ba MP Kontra Membru CPN-CNRT

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here