Diretora Saude Municipio Dili, Agostinha Segurado.Imajen/Antonio Goncalves

DILI,27 janeiru 2021(TATOLI)—Durante fulan janeiru, Serbisu Saúde Munisípiu Dili, rejista kazu dengue hosi postu administrativu haat, hamutuk 51.

Diretora Serbisu Saúde Munisípiu Dili, Agostinha Segurado fó sai katak, dadus ne’e ekipa vizilánsia rekolla hosi fasilidade saúde privada no Governu, inklui Ospitál Nasionál Guido Valadares hahú hosi loron 1 to’o 25 janeiru 2021, ne’ebé laiha ema ruma mate.

Notísia Relevante: 2020, SMD rejista pasiente dengue 813, mate na’in 7

“Kazu hirak ne’e maioria labarik ho idade tinan lima, no ema boot idade 30-resin, ne’ebé loron ida rejistu ema na’in rua, másimu ema na’in haat,” Agostinha Segurado, ba jornalista Agência Tatoli iha Sentru Saúde Formoza, kuarta (27/01).

Hare ba númeru ne’e, parte Serbisu Saúde Munisípiu Dili esforsu hodi halo prevensaun liuhosi sensibilizasaun ba komunidade atu mantein ambiente moos liu-liu ba hahalok ne’ebé so’e foer arbiru.

Alende ne’e, ekipa vizilánsia mós distribui ai-moruk abate iha aldeia sira ne’ebé afetadu ba kazu dengue.

”Foin daudaun ita muda estratejia, ezemplu ita rega dala-tolu ona iha aldeia Terus Na’in suku Vila Verde, maibé kazu ne’e mosu nafatin. Entaun, ekipa vizilánsia labele kontinua rega, tanba bainhira rega kímiku fila-fila no laiha mudansa, signifika ne’e komunidade mak la kuidadu ambiente,” nia subliña.

Parte Serbisu Saúde Munisípiu Dili mós labele halo fomigasaun tanba efeitu hosi kímiku ne’ebé rega beibeik suar bele halo ema me’ar  no infesaun respiratóriu inklui bele hamate ai-horis ne’ebé besik uma.

Entretantu, númeru kazu dengue 51 ne’e maioria hosi Postu Administrativu Don Aleixo, Vera Cruz, Kristu Rei, no Nain-Feto la inklui  ho Postu Administrativu Metinaro no Ataúro.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here