DILI,25 janeiru 2021 (TATOLI)—Klínika Bairru-Pite rejista ona pasiente dengue na’in-rua iha fulan janeiru 2021, tanba ne’e jestór Inácio dos Santos apela ba timoroan tomak liuliu komunidade iha Dili, atu halo prevensaun ba moras ne’e.
“Iha fulan janeiru ami detekta labarik na’in-rua ho moras dengue no ami relata ona ba vizilánsia serbisu Saúde Munisípiu Dili hodi halo fomigasaun,’’ Inácio dos Santos, ba jornalista Agência Tatoli iha serbisu fatin, segunda (25/01).
Notísia Relevante:2021, Governu aloka rihun $240 ba klínika Bairru-Pité
Nia dehan, pasiente na’in rua ho kondisaun ladún grave, nune’e halo de’it tratamentu iha klínika ne’e no alta ona.
“Labarik na’in-rua ne’e ho kondisaun di’ak oituan, entaun ami halo de’it tratamentu iha ne’e. Baibain, pasiente ne’ebé ho kondisaun grave ami transfere ba Ospitál Nasionál Guido Valadares,’’ Inácio dos Santos informa.
Jestór klínika ne’e rekoñese katak, oras ne’e tempu udan, no bee sei nalihun iha fatin hotu ne’ebé sei lori impaktu ba ema liu liu ba labarik sira.
Tanba ne’e, nia husu ba komunidade tenki prevene aan liu hosi hamoos ambiente uma nian, hakoi lata mamuk sira, labele tara roupa iha parede, toba iha muskiteiru laran, no hamoos vazu ai-funan.
Kona-bá medikamentu, oras ne’e daudaun klínika ne’e laiha problema hodi halo tratamentu ba pasiente dengue tanba Ministériu Saúde (MS) finansia ona ho orsamentu mai hosi fundu globál ne’ebé sempre transfere kada fulan.
Oras ne’e daudaun klínika ne’e iha médiku na’in-hitu, parteira na’in 10, enfermeiru na’in 18, tékniku laboratóriu na’in-haat, farmasista na’in-ida, enfermeiru dentál na’in-rua, no totál funsionáriu sira hamutuk na’in 74 inklui cleaner.
Jornalista: Felicidade Ximenes
Editór: Cipriano Colo
