DILI, 27 janeiru (TATOLI)–Deputadu Bankada Partidu Demokrátiku (PD), António da Conceição, prontu ba hatán iha Tribunál bainhira Parlamentu Nasionál hasai levantamentu imunidade.
Deputadu António da Conceição loloos hatán iha tribunál iha loron 14 janeiru 2021 maibé seidauk bele hatán tanba PN seidauk halo levantamentu ba imunidade.
Notísia Relevante: PN sei hasai imunidade ba Deputadu António da Conceição
Nia rekoñese sai arguidu ba kazu partisipasaun ekonómika bainhira asume kargu Ministru Komérsiu Indústria no Ambiente (MKIA) iha 2014.
Nia dehan, kazu administrasaun danoza ne’e kestaun jestaun ninian maibé nia sente presaun tanba ema hotu ko’alia maibé nia la sente presaun tanba la’ós nia mak prátika ba kazu refere.
“Ha’u hein no prontu hela atu ba (hatán). Ne’ebé, hanesan polítiku, hanesan ema ida-ne’ebé hola tiha ona responsabilidade ba Estadu, se buat ruma la loos tenke ba hatán. Ne’e normál ba sidadaun hotu-hotu,” Deputadu António da Conceição informa ba jornalista sira iha resintu Parlamentu Nasionál, kuarta ne’e.
Nia esplika, sai arguidu ba kompra ekipamentu iha dirasaun indústria nian iha 2014. Nia haktuir, diresaun Aprovizionamentu no Lojístika iha MKIA mak simu sasán.
“Bainhira nia mai dehan ba ministru katak sasán simu ona, ita boot (ministru) asina pagamentu no ida-ne’e mak ha’u-nia responsabilidade fasilita. Se ha’u la asina entaun husik tusan ba tinan oin. Ne’e hanesan ha’u tau problema ida ba Estadu, bainhira osan iha hela la gasta. Se ha’u la asina mós trava ona kompañia ida-ne’ebé gasta nia osan ba sosa sasán,” Eis MKIA ne’e hateten.
Maske nune’e, nia parte prontu ba hatán iha tribunál bainhira PN aprova ona levantamentu imunidade.
Notísia Relevante: PD prontu kolabora aprova levantamentu imunidade ba Deputadu António da Conceição
Jornalista: Evaristo Soares Martins
Editór: Cancio Ximenes