Membru PN hosi Bankada PD, António da Conceição ‘Kalohan'. Imajen TATOLI/António Gonçalves

DILI, 20 janeiru 2020 (TATOLI)–Parlamentu Nasionál (PN) sei hasai imunidade ba Deputadu António da Conceição tanba paresér Komisaun A (Justisa no Konstitusionál) iha ona meza parlamentu.

Notísia Relevante: Tribunál husu PN hasai imunidade Deputadu António da Conceição

Prezidente Parlamentu Nasionál, Deputadu Aniceto Longuinhos Guterres Lopes, esplika pedidu kona-ba prosesu levantamentu tama tiha ona.

Maibé tanba iha tinan 2020 liubá parlamentu preokupadu diskute Orsamentu Jerál Estadu rua (2020 no 2021) nune’e to’o 31 dezembru 2020 seidauk reune hodi halo plenária ida atu foti imunidade.

“Iha ona paresér hosi Komisaun A mai ona meza parlamentu. Depois, tempu sira tuir mai bele halo ajendamentu atu hasai imunidade,” Aniceto Guterres informa ba jornalista sira hafoin hala’o enkontru ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru-Pité, Dili, kuarta ne’e.

Prezidente Parlamentu Nasionál haktuir, iha semana rua liubá, Parlamentu Nasionál autoriza Deputadu António da Conceição presta deklarasaun iha Ministériu Públiku nu’udar sasin la’ós hanesan arguidu.

“Maibé hanesan arguidu tenke halo levantamentu imunidade tanba pedidu iha tiha ona. Ami sei prosesa,” Aniceto Guterres hateten. 

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here