Líder Karismátiku, Kay Rala Xanana Gusmão hato’o votu parabéns ba Pe. Dasbach hodi selebra ninia aniversáriu ba dala- 84. Imajen/Espesiál

DILI, 26 janeiru 2021 (TATOLI)–Líder Karismátiku Kay Rala Xanana Gusmão, ohin, vizita eis-padre Richard Dascbach iha rezidénsia ida iha Kapitál Dili hodi selebra no hato’o votu parabénsa ba eis-padre ne’e ninia aniversáriu ba dala-84 (26 Janeiru 1937-26 Janeiru 2021).

Notísia Relevante: Arkidioseze Dili afirma nia posizaun ba kazu eis-padre Richard Daschbach

Selebrasaun aniversáriu tinan ne’e simples no difirensa ho tinan hirak ba kotuk ne’ebé sempre selebra ho labarik sira, maibé ba tinan ida-ne’e tenke selebra mesak iha rezidénsia ida iha Kapitál Dili tanba submete hela iha prosesu justisa ligadu ho kazu ne’ebé nia enfrenta.

Maske iha ámbitu ne’ebé difirente, maibé hetan vizita supreza hosi prezensa Líder Karismátiku Kay Rala Xanana Gusmão ne’ebé iha biban ne’e aproveita hodi transmite hela lia-menon hosi labarik sira iha Orfonatu Topo Honis-Oé-Cusse nian ba padre refere.

Mensájen ne’e hetan reasaun pozItivu hosi eis-padre Dascbach hodi kontinua husu tulun ba Líder Karismátiku Kay Rala Xanana Gusmão atu tau matan ba labarik Orfonatu sira iha Kuatete, Rejiaun Administrativa Espesiál Oé-Cusse Ambeno (RAEOA).

“Ha’u, ohin, sente animadu tebes ho ita-nia prezensa. Maibé, ha’u husu nafatin ita-nia tulun hodi kontinua tau matan ba labarik orfonatu sira iha Kuatete. Ita na’in-rua la importante ona maibé labarik sira mak importante liu iha tempu oin mai no presiza tau matan ba sira,” Eis-Padre Dascbach hameno ba Kay Rala Xanana Gusmão liuhosi komunikadu imprensa ne’ebé Agência TATOLI asesu.

Líder Karismátiku, Kay Rala Xanana Gusmão hato’o votu parabéns ba eis-Padre Dascbach hodi selebra ninia aniversáriu ba dala- 84. Imajen/Espesiál

Xanana hato’o hela karta mensájen hosi labarik orfonatu Topu-Honis ba Pe. Dascbach. Konteúdu hosi karta ne’e, labarik orfonatu sira hakerek katak, “Parabéns, ami hadomi nafatin Amu Dascbach”.

Eis primeiru-ministru, Kay Rala Xanana Gusmão, antes ne’e marka prezensa iha tribunál distritál Dili, fulan-outubru 2020 liubá relasiona ho kazu providénsia kautelár hosi JU,S hasoru arkidiozese metropolitana Dili, husu atu dada fali relatóriu hosi Komisaun Justisa no Paz kona-ba peskiza ida iha Orfonatu Topo Honis-Oekusi.

Eis-Padre Dascbach moris iha loron 26 Janeiru 1937 iha Pennsylvanian, Estadus Unidu Amérika (EUA) hahú tama lori misaun evanjelizasaun Katólika ba rai enklave Oé-Cusse-Ambeno iha tinan 1972 to’o tinan 2018.

Nia ordena sai padre iha tinan 1965, no liu tinan rua de’it, nia mai ona Nusa Tenggara Timur (NTT) no ikus liu tama ba Ambeno iha tinan 1972.

Invazaun Indonézia mai Timor-Leste, nia iha hela Oe-Cusse-Ambeno to’o tinan 1999 mós nia la halai hodi tuba-rai metin iha Kuatete, Ambeno no konsege subar joven lubuk ida hosi atakasaun pro-integrasionista sia iha tempu ne’ebá.

Durante hala’o misaun evanjelizasaun, nia mós harii tiha uma mahon ida ho naran Topu-Honis (Guide To Life) iha tinan 1993 ho objetivu atu fó mahon ba labarik kbi’it la’ek no orfonatu sira.

Rezultadu hosi orfonatu ne’e, konsege lori nia amigu sira hosi Amérika hodi halo adosaun ba Ambeno oan na’in-hitu (7) oras ne’e eskola ramata ona. Sira-nia ensinu superiór iha universidade balun iha Amérika, no balun iha Austrália, inklui mós balun oras ne’e iha deviza boot iha instituisaun F-FDTL no instituisaun Estadu seluk tan.

Oras ne’e nia kumpre hela prosesu judisiál (Termu Identidade Rezidénsia) iha Dili laran hodi hein prosesu julgamentu tuir mai kona-ba alegasaun kriminál hosi Ministériu Públiku.

Notísia Relevante: Don Basílio: “Santa Sé liman todan ba kazu abuzu seksuál hasoru labarik menór idade”

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here