Arsebispu ba Arkidioseze Metropolitana Dili, Virgílio do Carmo da Silva, SDB. Imajen Tatoli/Egas Cristovão.

DILI, 06 outubru 2020 (TATOLI)–Arsebispu Metropolitana Dili, Don Virgílio do Carmo da Silva, SDB, partikularmente liuhosi Arkidioseze Dili afirma nia pozisaun hodi hato’o deskulpa ba públiku relasiona ho polémika ne’ebé mosu iha públiku kona–ba kazu eis-padre Richard Dachbach ne’ebé hetan alegasaun ba kazu abuzu seksuál hasoru labarik minoridade.

Arsebispu ba Arkidioseze Metropolitana Dili, Virgílio do Carmo da Silva, SDB. Imajen Tatoli/Egas Cristovão.

“Arkidioseze Dili tau-nia konfiansa tomak iha Autoridade Judisiál Polisiál Estadu nian inklui mós ho sira hotu ne’ebé involve iha kazu señór Daschbach nian. Tanba ne’e, lori Dioseze Dili nia naran atan ha’u ho haraik-aan hakarak hato’o ami-nia deskulpa ba akuzasaun no alegasaun sira-ne’ebé publikamente hasoru no sira ne’ebé involve iha investigasaun ne’e,” Arsebispu Metropolitana Dili, Don Virgílio do Carmo da Silva, SDB, hateten liuhosi konferénsia imprensa iha Cámara Eclesiástica, Lecidere, Dili, tersa ne’e.

Don Virgílio esplika, hodi Arkidioseze Dili nia naran hateten uma kreda hakarak fó nia apoiu no tulun nafatin ba vítima sira-ne’ebé Autoridade Judisiál sira deklara sai.

“Uma Kreda hafoun Nakloke-aan ba ema hotu atu kolabora ho NGO, nune’e mós organizasaun sosiedade sivíl hotu–hotu atu fó apoiu ba vítima sira-ne’ebé Autoridade Juridisiál, polisiál sira deklara sai. Tanba ne’e, dala ida tan hakarak hato’o ami-nia deskulpa ba hahalok hirak ne’ebé hamosu dezentendimentu iha públiku tanba relatóriu Komisaun Justisa no Paz nian ne’e la refleta opiniaun hanesan ne’e. Nune’e, atan ha’u nu’udar Arsebispu nia haree katak sira-nia relatóriu mós hakat liu sira-nia kompeténsia,” nia dehan.

Tanba ne’e, relasiona ho kazu eis-padre Richard Daschbach nian ne’e mak Don Virgílio deside ezonera Padre Herminio de Fátima Gonçalves ne’ebé maka antes ne’e sai hanesan Diretór Komisaun Justisa no Paz Dili nian.

“Ha’u nu’udar bispu deside atu ezenora amu Hermino de Fatima Gonçalves hosi nia kargu nu’udar Diretór Komisaun Justisa no Paz Dili nian tanba ligasaun ho kazu ida-ne’e. Ha’u deside atu hapara nia hosi servisu tanba ho razaun buat ne’ebé nia halo iha nia relatóriu hetan indísiu ruma kona-ba alegasaun akuzasaun hasoru Ministériu Públiku nia investigasaun,” Don Virgílio hateten.

Maibé, Arsebispu ne’e esplika ezonera Padre Herminio de Fátima Gonçalves hosi nia kargu ne’e hanesan hapara nia nu’udar Diretór ba Komisau Justiza no Paz maibé la’ós hapara nia hanesan amu-lulik maibe nia kontinua nafatin hala’o knaar nu’udar amu-lulik baibain.

Tanba ne’e, Don Virgílio hateten, vatikanu liuhosi Nunsiotória Apostoliká partilla no apoiu atetude Arsebispu Don Virgílio tau nafatin konfiansa tomak iha instituisaun demokrátika no sistema judisiál iha Timor-Leste.

“Atan ha’u hakarak fó no konfirma dala ida tan, pozisaun uma kreda ninian liga ho kazu Señór Daschbach  nu’udar eis-padre ninian iha tinan rua liu ba, Amu Papa hasai tia ona hosi kargu nu’udar amu-lulik,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here