DILI,25 janeiru 2021(TATOLI)—Iha fulan dezembru 2020, klínika Bairru-Pite rejista pasiente tuberculose (TB) na’in 112, ne’ebé tenke halo izolamentu ba pasiente na’in 22 tanba pozitivu kaben tasak, no ida labele salva (mate).

“Iha fulan dezembru 2020,  ita detekta pasiente ho moras tuberculose hamutuk na’in 112. Hosi númeru ne’e, na’in 22 mak pozitivu kabén tasak no sira halo izolamentu iha ne’e durante loron rua to’o tolu, depois ami halo transferénsia ba iha Tibar  hodi kontinua izolamentu no halo tratamentu,’’Jestór klínika Bairru-Pite, Inácio dos Santos hateten ba jornalista Agência Tatoli iha serbisu fatin, segunda ne’e.

Notísia Relevante:Dezembru 2020, klínika Bairru-Pite rejista má nutrisaun 105

Jestór klínika ne’e informa, iha dezembru nia laran, pasiente ida hosi númeru 22 ne’ebé pozitivu kabén tasak lakon vida, tanba antes ne’e halo ona tratamentu no rekoperadu, maibé ikus mai hetan fila-fali tuberculose no hala’o hikas tratamentu.

“Maibé, parte pulmaun  no aten parte los nian mutin, signifika kanek no ita-nia médiku koko atu halo tratamentu, la konsege salva nia vida,” nia subliña.

Nia dehan, oras ne’e daudaun pasiente ne’ebé kontinua baixa ho kondisaun extrapulmonar ka negativu no la’ós kabén tasak, hela de’it pursentu 50 hosi totál pasiente ne’ebé mak iha.

Kona-bá medikamentu, oras ne’e daudaun klínika ne’e laiha problema hodi halo tratamentu ba pasiente tuberculose tanba Ministériu Saúde  (MS) finansia ona ho orsamentu mai hosi fundu globál  ne’ebé sempre fornese mensalmente.

Oras ne’e daudaun klínika ne’e iha médiku na’in-hitu, parteira na’in 10, enfermeiru na’in 18,  tékniku laboratóriu na’in-haat, farmasista na’in-ida, enfermeiru dentál na’in-rua, no totál funsionáriu sira hamutuk na’in 74 inklui cleaner.

Notísia Relevante:2021, Governu aloka rihun $240 ba klínika Bairru-Pité

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here