Jestór klínika Bairru-Pite, Inácio dos Santos. Imajen/Felicidade Ximenes.

DILI,25 janeiru 2021 (TATOLI)—Oitavu Governu liuhosi Gabinete Primeiru Ministru (GPM), aloka osan ho montante rihun $240 hosi Orsamentu Jerál Estadu (OJE) 2021, ba klínika Bairru-Pite.

“Tinan ida ne’e, Gabinete Primeiru Minsitru  mak tau fundu ba ami  hamutuk rihun $240-resin atu hala’o ami nia programa sira iha ne’e,’’ Jestór klínika Bairru-Pite, Inácio dos Santos hateten ba jornalista Agência Tatoli, iha nia kna’ar fatin, segunda ne’e.

Notísia Relevante:  Krize finanseira, Klínika Bairru-Pité hein MS transfere orsamentu

Jestór klínika ne’e informa katak, ho apoiu hirak ne’e maka, oras ne’e daudaun atendimentu la’o normál hanesan uluk, liuliu re-ativa hikas programa sira ne’ebé antes ne’e taka tanba krize finanseira.

Nia temi katak, antes ne’e sala baixa mós taka, sala partus nian, inklui tratamentu espesífiku balun, maibé oras ne’e re-ativa hikas no númeru pasiente mós sa’e fila-fali hanesan tinan kotuk.

Totál atendimentu ne’ebé oras ne’e klínika Bairru-Pite  iha mak hanesan, atendimentu kuidadu saúde primária,  konsulta ambulátoriu, internamentu baixa,  izolamentu ba moras TBC, partus, kuidadu imunizasaun,  serbisu sosiál feto má nutrisaun, dentaria,  farmásia, laboratóriu, sala  emerjénsia,  HIV-SIDA, lepra no kankru raan.

“Programa sira ne’e mak oras ne’e daudaun funsiona ona no númeru pasiente mós kontinua sa’e ba 200-resin  kada loron,’’ nia subliña.

Inácio dos Santos mós fó hanoin katak, iha tinan kotuk Minsitériu Saúde oferese rihun $15 kada fulan hahú hosi fulan jullu to’o dezembru, hamutuk rihun $90.

Kona-ba estoke ai-moruk, nia dehan, sufisiente hela atu bele halo tratamentu ba pasiente sira hosi fatin atendimentu hirak ne’ebé temi ona.

Oras ne’e daudaun klínika ne’e iha médiku na’in-hitu,  parteira na’in 10,  enfermeiru na’in 18,  tékniku laboratóriu na’in-haat,  farmasista na’in-ida, enfermeiru dentál na’in-rua, no totál funsionáriu sira hamutuk na’in 74 inklui cleaner.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here