Jestór klínika Bairru-Pite, Inácio dos Santos. Imajen/Felicidade Ximenes.

DILI,25 janeiru 2021 (TATOLI)—Iha fulan dezembru 2020, klínika Bairru-Pite rejista kazu má nutrisaun moderadu no krónika hamutuk 105.

“Kazu má nutrisaun moderadu no krónika  ne’e ita rejista iha fulan dezembru liu hosi screening.  Oras ne’e daudaun iha pasiente ne’ebé baixa hamutuk na’in 20, tanba má nutrisaun króniku,’’ Jestór klínika Bairru-Pite, Inacio dos Santos hateten ba jornalista Agência Tatoli iha serbisu fatin, segunda ne’e.

Maski númeru kazu ne’e boot, maibé nia dehan, durante tinan 2020 seidauk rejistu labarik ruma lakon vida tanba má nutrisaun.

Kona-ba tratamentu, nia esplika, depende ba kategoria, ezemplu má nutrisaun moderadu signifika la baixa, maibé fó informasaun ba inan-aman sira oinsá utiliza hahán ne’ebé iha nutrisaun no saudável ba labarik sira.

Kona-bá má nutrisaun ne’ebé  króniku, nia hatutan, baixa iha klínika ne’e atu bele aproveita hadi’a pasiente sira nia nutrisaun hanesan utiliza fórmula ne’ebé hanaran F100 no F75  ne’ebé nutrisionista sira kria no dalaruma suplementu sira ne’e hetan direta hosi Minsitériu Saúde.

“Estoke suplementu nutrisaun  oferese hosi Ministériu Saúde liuhosi Serbisu Saúde Munisípiu Dili no UNFPA  sei sufisiente hela hodi fó ba labarik sira atu konsumu,” nia subliña.

Oras ne’e daudaun klínika ne’e iha médiku na’in-hitu, parteira na’in 10,  enfermeiru na’in 18,  tékniku laboratóriu na’in-haat,  farmasista na’in-ida, enfermeiru dentál na’in-rua, no totál funsionáriu sira hamutuk na’in 74 inklui cleaner.

Notísia Relevante:2021, Governu aloka rihun $240 ba klínika Bairru-Pité  

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here