Negosiante ida tuur hein hela nia sasán ne’ebé faan ho karosa iha área Mandarin, Dili. Imajen TATOLI/Antonio Goncalves.

DILI, 22 janeiru 2021 (TATOLI)–Xefe Departamentu Jestaun Merkadória Munisípiu Dili, Berta Santa Gonçalves Vieira, informa Jestaun Merkadória Munisípiu Dili koloka ona nia ekipa hodi kontrola ba fatin sira-ne’ebé Estadu no Governu la autoriza atu komunidade sira utiliza ba negósiu.

Notísia Relevante: Dekretu Lei 33/2018, Bandu Vendedór Fa’an Sasán Iha Estrada Públiku

“Ita hahú koloka ona ita-nia ekipa iha fatin sira hanesan iha Klinika Foho Osan Mean Audian nia oin, Ponte Becora, Mini Merkadu Bairru-Pite, Kampung Baru Comoro no mós iha eis merkadu Comoro nian hodi kontrola no tau matan ba negosiante sira-ne’ebé mak faan sasán iha trotoar leten,” Berta Santa Gonçalves Viera hateten ba Agência TATOLI liuhosi telefónika, sesta ne’e.

Berta Santa hatutan, la’ós de’it negosiante timoroan ne’ebé faan modo-tahan no ikan sira de’it mak faan iha trotoar leten maibé xinés sira mós dalaruma faan sira-nia sasán iha trotoar leten.

“Kestaun ne’e, ita sempre tau atensaun maibé ita-nia negosiante mak laiha konsiénsia. Maibé ita nunka baruk no kolen atu ko’alia ba sira. Ami kuaze loro-loron avizu ba sira katak labele faan iha dalan ninin ka trotoar leten,” nia dehan.

Nia hateten meiu ida-ne’e mak ekipa Jestaun Merkadória uza hodi kontinua halo alarma ba sira. Nia dehan, ekipa jestaun sempre halo kontrollu ba ema sira ne’ebé faan modo iha dalan ninin no prende sira-nia sasán maibé hirak ne’ebé toman ona ne’e faan nafatin.

Berta hateten, iha Estadu Emerjénsia dahuluk to’o agora, Ekipa Jestaun Merkadória nia papél mak nafatin halo kontrollu ba negosiante sira faan sasán iha merkadu no iha dalan públiku sira.

“Ami to’o agora la muda ami-nia servisu hanesan kontrollu ema ne’ebé mak faan iha dalan ninin. Ami kontinua halo patroliamentu makaas ba fatin ne’ebé mak Estadu no Governu bandu labele uza ba negósiu nian,” nia dehan.

Nia dehan, ekipa jestaun kontinua alerta informasaun ba negosiante sira, ne’ebé liga ba Estadu Emerjénsia katak labele akumula malu liu ema na’in-10 iha dalan públiku.

“Ami-nia ekipa loro-loron alerta hela de’it ba komunidade sira iha merkadu no dalan ninin katak labele butuk ema na’in-10. Bainhira sira faan sasán mak barak, ami sempre haruka fila tiha maibé liu de’it oras balun komesa butuk fali de’it,” nia hateten.

Maibé, nia dehan, ekipa jestaun merkadória la lakon esperansa hodi kontinua avizu ba sira, beibeik no ba nafatin to’o negosiante sira-ne’e bele komprende no bele tau iha konsiderasaun.

Notísia Relevante: Ema La’o Ain Sira Preokupa Ho Trotoár Ne’ebé Uza Hodi Fa’an Sasan

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here