Aktividades vendedores buka vida moris iha kapital Dili, Katuas ida dudu hela nia karosa ho Nu lao haleu kapital Dili hodi buka konsumidores, Dili 25 Marsu 2019. Imajen/ António Gonçalves

DILI,(TATOLI)-Dekretu Lei Nú.33/2018 loron 27 Agostu, kona-ba ijiene no orden publika, bandu vendedór ambulante halo negósiu ka sirkula fa’an sasán iha fatin públiku no besik repartisaun estadu.

Bazeia ba dekretu lei ne’e, Xefe Departamentu Saneamentu Munisípiu Dili (SMD), Domingos dos Santos Soriano, hateten, fó biban ba Autoridade Munisipiu Dili  hodi fo notifikasaun ba vendedór ambulante atu la bele fa’an sasán iha trotoar leten ho espasu públiku.

 “Estrada públiku kuandu ita fa’an iha ne’ebá, orasida hothotu ba fa’an iha ne’ebá, toba tan iha ne’ebá, ita haree imajen ou ambiente la di’ak ba ita-nia sidade”, afirma  Domingos dos Santos Soriano, hodi responde Ajénsia Notisioza TATOLI, horiseik, iha  edifísiu Administrasaun Munisípiu Dili, Matadouru.

Bazeia ba dekretu lei ida ne’e, Domingos Soriano hatutan, ekipa orden públiku ka guarda munisipál husi Munisípiu Dili, loroloron tuun ba halo operasaun iha sidade Dili ba vendedór sira ne’ebé fa’an sasán iha fatin públiku nian.

“Buat hotu depende ba ita-nia komunidade sira; komprende, iha konsiénsia, ita-nia sidade ne’e bele sai di’ak. Kuandu nune’e hela de’it, susar la halimar”, hateten Xefe Departamentu, Domingos dos Santos Soriano.

Relasiona mós ho kestaun ne’e, tuir notifikasaun Prezidente Autoridade Munisípiu Dili, Gaspar Soares, iha loron 11 Marsu 2019, destinadu ba vendedór ambulante, vendedór nuu laloir, manu/ikan tunu, baksu, loja, kompañia no seluk tan, bazeia ba dekretu lei nú.33/2018 loron 27 Agostu, tuir artigu 5, e no 6.3, husu ba vendedór sira hotu atu labele kontinua fa’an sasán iha área Jardin Largo Lecidere, Ministériu Negósiu Estranjeiru no Kooperasaun nia oin ho area sira públiku nian iha Audian  (Farmásia Foho Osan Samean) nia oin. Nune’e mós, área Elemloi, área Farol, área Kampung Baru, Comoro, Eis-merkadu Comoro nia oin, área Perumnas Bairo-Pite, Jardim Cristo Rei, Jardim 5 de Maiu no seluk tan.

Notifikasaun ho karimbu ofisiál no asinatura Prezidente Autoridade Munisípiu Díli, Gaspar Soares, ne’e mós apela ba vendedór sira katak Jestaun Merkadu no Guarda Munisipál Dili hamutuk ho Polísia Nasionál Timor-Leste (PNTL) Munisípiu Dili sei halo operasaun konjunta iha fatin sira mensionadu no fatin hot-hotu iha área Administrasaun Munisípiu Dili.

Hahún husi notifikasaun husi Autoridade Munisípiu Dili nian, Movimentu Sosiál Timor-Leste (MSTL) hamutuk ho vendedór ambulante sira “hamrik” no “foti lian” hodi kontra notifikasaun ida ne’e tanba konsidera ne’e polítika ida ne’ebé mak la afavór ba interese koletiva maibé ba de’it iha interese privada.

MSTL konsidera notifikasaun Autoridade Munisipiu Dili nian ne’e hamate no hasees povu vendedór ki’ik sira husi sentru ekonómiku ba iha área preférika no fó de’it espasu dignu ba klase osan na’in sira hodi akumula osan ka kapitál lais ba sira-nia interese.

Ho konsiderasaun sira ne’e, MSTL envolve mós ho vendedór ambulante sira halo konferénsia imprensa iha Largo Lecidere, iha loron 2 Abril 2019 ho portavós I, Constâncio de Jesus no Paulo Soares da Cruz nu’udar portavós II.

komunikadu MSTL ne’ebé TATOLI asesu, ezije atu  hapara hikas polítika eviksaun hasoru vendedór ambulante sira.

Husu Autoridade Munisípiu Dili atu altera karta ho asuntu notifikasaun ne’ebé fó sai iha dia 11 Marsu 2019, bazeia ba dekretu lei nú.33/2018, 27 Agostu, kona-ba ijiene no orden públiku ne’ebé proibe ka bandu atividade vendedór sira nian iha sidade.

Husu ba Guarda Munisipál atu hapara agresaun fízika hasoru vendedór sira no ezije ba parte kompetente hodi kria kondisaun favoravel no dignu ba povu ki’ik vendedór sira hodi nune’e povu ki’ik sira bele ezerse nia direitu nu’udar sidadaun iha sidade no territóriu laran.

Husu mós ba parte kompetente atu labele dezeña sidade tuir de’it klase osan na’in sira hodi hasees klase ki’ik sira iha sidade laran nomós husu ba órgaun kompetente atu halo rekonseitualizasaun partisipativa ba planeamentu urbana iha sidade Dili.

Remata konferénsia imprensa, MSTL hamutuk ho vendedór ambulante sira halo karavana ho asaun pásifika lori ho espanduk hodi mai to’o iha aredór Parlamentu Nasionál (PN), nune’e bainhira to’o iha  PN nian, la kle’ur de’it, hetan atuasaun direita husi PNTL ho tiru gás lakrimójeneu no rezulta ema kanek no raan.

FONTIL Kondena 

Ho akontesimentu ne’e, Forum ONG Timor-Leste (FONTIL) kondena asaun fíziku no violentu ne’ebé akontese iha loron horiseik Oras Tuku 12:00 lokaliza iha Edifísiu Parlamentu Nasionál nian oin, rezulta ema na’in 7 maka sai vítima ba aktu violentu fíziku ne’ebé komete hosi membru Polísia Nasionál Timor-Leste (PNTL).

“Vítima sira na’in 3 hetan sofrementu kmaan, na’in 1 mak todan, na’in 2 hetan kapturasaun no detein iha sela PNTL Caicoli, no na’in 1 (Sra. Madalena) ne’ebé kanek no hetan suku pontu 2 no oras ne’e daudauk fila ona ba nia uma iha Faról,” refere komunikadu FONTIL.

FONGTIL ho nia membru tomak hamutuk 339 kondena maka’as asaun brutal ne’ebé komete hosi PNTL. FONTIL ezije katak Provedor Direitu Humanus no Justisa atu halo nia kna’ar loloos no lalais hodi halo investigasaun kle’an ba aktu violasaun direitu umanu hasoru sidadaun baibain sira. Inklui prosesa ba Ministériu públiku atu halo asaun kriminál kontra autór ne’ebé pratika krime kontra ema nia direitu ba seguransa no liberdade.

Husu ba komandante PNTL Munisípiu Dili atu hola responsabilidade másimu ba aktu violasaun fíziku ne’ebé maka akontese. Presiza investiga no identifika autór ne’ebé impoin asaun brutál ba asaun Pasífiku ida ne’e.

Husu ba Parlamentu Nasionál nu’udár órgaun reprezentante povu nian atu diskute kle’an kona-ba problema ne’ebé maka vendedór ambulante sira hasoru hodi hetan solusaun justu, dignu no permanente.

Husu ba Primeiru-Ministru no mós autoridade Munisipiu Dili atu avalia fila-fali desizaun kona-ba, duni sai negosiante ambulante sira ho forsadamentu no organiza di’ak liu tan vendedór sira atu la prejudika povu nia rendimentu hodi hatutan sira nia moris.

Husu ba Estadu, Governu, Parlamentu Nasionál atu hapara ona polítika odio vingansa hodi bele kria kondisaun ba povu hodi buka moris.

Notísia relavente: http://www.tatoli.tl/2019/04/pedro-belo-investigasaun-maka-justifika-kauza-vitima-kanek/?fbclid=IwAR08c3UWUvbjgiuPe2jhGT4OFlwcL33wpyj_P29F3PPwQA1qeDeuRr30yPk

Jornalista: Rafy Belo

Editór: Francisco Simões

HAKEREK NO HATÁN

Please enter your comment!
Please enter your name here