Arguidu sira deskunfia fa'an rai Estadu partisipa iha julgamentu iha Tribunál Distritál Dili, Kinta (21/01/2021). Imajen Tatoli/Nelson de Sousa

DILI, 21 janeiru 2021 (TATOLI)-Arguidu Diretór Jerál Diresaun Nasionál Terras no Propriedade (DNTP) ho inisiál RM ho arguidu na’in-sia (9) seluk, ohin, partisipa iha julgamentu primeiru interrogatóriu iha Tribunál Distritál Dili (TDD).

Arguidu sira ne’e kumpre ona detensaun iha sela polísia durante oras 72 ba kazu ne’ebé deskonfia envolve iha fa’an rai Estadu hodi benefisia ba aan rasik.

Notísia Relevante : SIKN detein diretór jerál DNTP

Arguidu sira ne’e hanesan Diretór DNTP, autoridade lokál nu’udar Xefe Suku Manleuana, Xefe Aldeia Lisbutak no delegadu Lisbutak, membru polísia balun no sidadaun sira seluk tan.

Arguidu sira ba kazu fa’an rai Estadu tuir julgamentu iha Tribunál Distritál Dili, Kinta (21/01/2021). Imajen Tatoli/Nelson de Sousa

Komandu Polisia Nasionál Timor-Leste (PNTL) liuhosi Servisu Investigasaun Kriminál Nasionál (SIKN) iha loron 18 janeiru 2021, ezekuta mandadu Tribunál Distritál Dili (TDD) ho númeru NUC 0077/20.GGCC hodi halo detensaun no buska ba Diretór Jerál Diresaun Nasionál Terras no Propriedade (DNTP) ho inisiál RM iha nia servisu fatin DNTP, Bebora Dili.

Durante halo detensaun, parte SIKN halo mós apreensaun ba dokumentu importante sira ne’ebé liga ho servisu DNTP nian kona-ba prosesu regula rai Estadu.

Notísia Relevante : Fa’an rai, SIKN detein autoridade Suku Manleuana

Hafoin halo tiha detensaun, SIKN kontinua lori suspeitu ba nia rezidénsia Manleuana, Dili hodi halo apreensaun ba karreta privadu rua, inklui foti mós dokumentu importante balun.

Iha loron 19 janeiru 2021, SIKN kontinua ezekuta mandadu detensaun Tribunál Distritál Dili ba primeiru interrogatóriu ho NUC0077/20.GGCC, hodi halo detensaun no buska ba autoridade Suku Manleuana iha sede suku Manleuana no arguidu sira seluk iha sira ida-idak nia rezidénsia iha area Suku Manleuana.

Durante buska ekipa SIKN halo mós apreensaun ba dokumentu balun inklui osan iha xefe aldeia nia rezidénsia
no mós halo apreensaun ba dokumentu sira hanesan, konta bankária, banku BRI, BNCTL, dokumentu na’in ba rai, inklui karreta tolu ho marka Baskolante Colt Diesel AD 125-PS xapa matrikula A.57-908, karreta Honda Fit xapa A.24589, TRITON xapa matrikula A.22.609 inklui motór tolu ho marka Honda KLX Q1-1902, Honda KLX P-6136, no Honda Beat ki’ik xapa matrikula P-4971.

Dokumentu no materiál hirak ne’e, ekipa SIKN halo apreensaun nu’udar evidénsia hodi Ministériu Públiku (MP) sei aprezenta ba Tribunál.

Arguidu sira deskonfia komete krime abuzu podér, danu agravadu, falsifikasaun dokumentu ka anotasaun téknika, falsifikasaun agravadu no korrupsaun pasiva ba aktu ilísitu, previstu no punidu iha artigu, 297, 259,303, 304 no 293 hotu-hotu iha kódigu penál.

Prosesu julgamentu primeiru interrogatóriu ne’e prezide hosi juiz Ivan Suritai, Ministériu Públiku reprezenta hosi prokuradór Matias Soares, arguidu sira hetan asisténsia legál hosi advogadu privadu Manuel Tilman, Cançio Freitas, Fernando da Costa no prosesu ne’e taka ba públiku inklui jornalista sira atu asesu iha sala audiénsia laran.

Jornalista   : Nelson de Sousa

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here