Aljema. Ilustrasaun

DILI, 18 janeiru 2021 (TATOLI)- Komandu Polísia Nasionál Timor-Leste (PNTL) liuhosi Servisu Investigasaun Kriminál Nasionál (SIKN), ohin, ezekuta mandadu Tribunál Distritál Dili hodi halo detensaun no buska ba Diretór Jerál Diresaun Nasionál Terras no Propriedade (DNTP) ho inisiál RM iha nia servisu fatin DNTP, Bebora, Dili.

Antes halo detensaun hodi tau aljema (borgol) ba RM nia liman, parte Investigadór SIKN halo aprezentasaun kona-ba Mandadu Tribunál Distritál Dili ba primeiru interrogatóriu ho NUC 0077/20.GGCC.

Durante halo detensaun, parte SIKN halo mós apreensaun ba dokumentu importante sira ne’ebé liga ho servisu DNTP nian kona-ba prosesu regula rai Estadu.

Suspeitu RM deskonfia envolve iha kazu krime abuzu podér, danu agravadu, falsifikasaun dokumentu  ka anotasaun téknika, falsifikasaun agravadu no korrupsaun pasiva para aktu ilísitu, previstu no punidu iha artigu, 297, 259,303, 304 no 293 Kódigu Penál.

Hafoin halo tiha detensaun, SIKN kontinua lori suspeitu nia rezidénsia Manleuana,, Dili, hodi halo apreensaun ba karreta privadu rua; ida marka Nissan no ida seluk Land Cruiser Prado ida inklui foti mós dokumentu importante balun.

Hafoin ida ne’e, PNTL kontinua lori suspeitu ba sela Polísia Munisípiu Dili hodi detein no sei halo investigasaun durante oras 72 hodi aprezenta ba Tribunál Distritál Dili.

Tuir observasaun Agéncia TATOLI nian nota, durante halo detensaun, suspeitu RM koopera ho parte SIKN hodi fó informasaun balun ne’ebé importante liga ho problema rai Estadu nian ne’ebé deskonfia suspeitu fa’an ba ema balun.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here