Estudante Sekundariu 30 Agostu, Comoro, Dili. Imajen Tatoli/Antonio Goncalves

DILI, 19 janeiru 2021 (TATOLI)–Diretór Nasionál Serbisu Edukasaun Munisípiu Dili, Duarte Braganza, apela ba dirijente hosi eskola sira iha kapitál Díli ne’ebé to’o oras ne’e seidauk hahú aula prezensiál atu re-ativa iha segunda (25/01).

“Kalendáriu hosi Ministériu Edukasaun Joventude no Desportu katak, prosesu aula prezensiál ba ensinu pré-eskolár, ensinu báziku, ensinu sekundáriu jerál, ensinu sekundáriu tékniku vokasionál inklui eskola privada sira loloos tenki re-ativa iha segunda 18 janeiru, maibé to’o agora seidauk. Entaun, husu atu semana oin tenke re-ativa ona,” Duarte Braganza hateten ba jornalista Agência Tatoli liuhosi telefónika, tersa ne’e.

Notísia Relevante:Semana oin estudante sira filafali bá eskola

Diretór ne’e rekoñese katak, eskola barak iha Dili seidauk re-ativa prosesu aprendizajen tanba sei preokupa ho inskrisaun no orientasaun, maibé nia husu atu re-ativa iha semana oin.

“Hanesan responsável edukasaun iha munisípiu Dili, husu ba parte eskola sira tenke realiza prosesu aula prezensiál iha segunda semana oin, nune’e labele prejudika estudante sira,” nia husu.

Duarte Braganza apela mós ba dirijente eskola sira atu kumpre no obedese nafatin ba protokolu saúde hodi fó hanoin ba estudante sira tenki utiliza máskara, fase liman beibeik no mantein distánsia sosiál.

Tuir observasaun jornalista Agência Tatoli nota katak, eskola sira iha kapitál Díli ne’ebé sei hala’o hela inskrisaun no orientasaun mak hanesan Eskola Ensinu Sekundáriu Jerál (ESJ) 4 setembru UNAMET Balide, ESJ São Pedro, ESJ 10 dezembru, ESJ 12 novembru, ESTV Becora, ESJ 30 agostu, Ensinu Báziku Hera, Ensinu Báziku Filiál (EBF) doque de Caxias, Ensinu Báziku Sentrál Faról, EBF Paiol, EBF Cristál, EBF Camea, EBF Metiaut, EBF Tuanalaran no EBF Mui Kuluhun.

Notísia Relevante: EBC Fatumeta simu estudante foun 400-resin

Jornalista: Tomé Amado   

Editór: Cipriano Colo

HAKEREK NO HATÁN

Please enter your comment!
Please enter your name here