Estudante Sekundáriu Nino Konis Santana Gleno. Imajen Tatoli/António Gonçalves

DILI, 12 janeiru 2021 (TATOLI)—Ministériu Edukasaun Juventude no Desportu (MEJD) sei re-ativa fali atividade eskolár iha loron segunda 18 janeiru, nune’e bele prepara prosesu inskrisaun no orientasaun ba estudante foun sira.

Diretór Jeral Pré-Eskolar, Ensinu Báziku no Ensinu Rekorenti, Apolinário Serpa Rosa  informa, MEJD hakarak re-ativa hikas atividade eskolár ne’e tanba estudante pré-eskolár, ensinu báziku, ensinu sekundáriu jerál no ensinu tekníku vokasionál bele kontinua fali aula prezensiál.

Notísia Relevante :Governu suspende prosesu aprendizajen no inskrisaun ba estudante

“Ministru suspende tiha atividade aula prezensiál ba estudante sira, liu de’it loron tolu nia revee filafali deklarasaun ne’e, tanba bazeia ba despaixu Konsellu-Ministru nian la hateten hapara atividade ensinu aprendijazen iha eskola sira, maibé husu de’it atu eskola sira kumpre nafatin medida protokolu ne’ebé iha ona,” Apolinário Serpa Rosa fó sai asuntu ne’e ba jornalista ajénsia Tatoli via telefone, Tersa ne’e.

Ne’e duni, tuir kalendáriu MEJD nian katak, molok hahú aula prezensiál ba estudante sira, eskola sira sei hala’o orientasaun ba estudante foun husi nível ensinu báziku no ensinu sekundáriu hahú husi 13 to’o 15 janeiru.

Tanba ne’e, iha prosesu aula prezensiál ne’e mak eskola sira tenki aplika medida protokólu distansiamentu sosiál, uza máskara, fase liman molok tama aula, estudante barak liu tenki fahe ba grupu atu nune’e labele kontra regras ne’ebé ona.

 MEJD tau prioridade ba eskola sira iha fronteira

Ministériu Edukasaun Juventude no Desportu (MEJD) mós deside ona katak, sei tau prioridade ba eskola sira iha liña fronteira atu hetan atensaun maka’as hodi nune’e bele prevene estudante sira husi COVID-19.

Apolinário Serpa Rosa, deklara katak eskola sira iha liña fronteira Batugade, Bobonaro, Covalima no Rejiaun Administrativa Espesiál Oe-Cusse Ambeno (RAEOA), sei hetan apoiu fasilidade prevensaun COVID-19 atu nune’e bele asegura labarik sira iha prosesu aula prezensiál.

“Ita agora sei iha stock máskara rihun 77. Máskara sira ne’e ita sei forñese hotu ba estudante sira iha liña fronteira. Bainhira ekipamentu prevensaun COVID-19 ne’e la sufisiente, ita sei husu nafatin apoiu ba ita nia parseiru dezenvolvimentu sira atu apoia tan,” Diretór Jerál ne’e hateten.

Tanba ne’e, MEJD sei distribui máskara hirak ne’e ba eskola sira iha fronteira iha tempu badak  nia laran  atu nune’e aula prezensiál hahú estudante sira bele utiliza.

Kona-ba hand sanitizer, tanki bee moos, parseiru sira husu MEJD atu halo proposta ruma ba ajénsia dezenvolvimentu sira, nune’e bele hetan apoiu lalais nune’e bele forñese ba eskola sira iha fronteira ne’ebé mak seidauk iha.

“Tanba eskola iha liña fronteira ne’e mak sai risku bo’ot liu bá surtu  Covid-19 ne’e rasik,” nia hakotu.

Jornalista : Tomé Amado

Editór: Agapito dos Santos

HAKEREK NO HATÁN

Please enter your comment!
Please enter your name here