Diretora EBC Fatumeta, Filomena Caldeira Belo.Imajen/Felicidade Ximenes.

DILI, 08 janeiru 2021 (TATOLI)—Eskola Ensinu Báziku Sentrál (EBC-sigla portugés) Fatumeta Dili, oras ne’e, hala’o hela prosesu inskrisaun ba estudante foun ne’ebé maka tuir planu sei simu estudante hamutuk 400-resin iha tinan letivu 2021.

Iha fin fulan-dezembru 2020, EBC Fatumeta halo ona prosesu inskrisaun faze dahuluk ba estudante foun sétimu ano ho totál 225, maibé la priénse númeru ne’ebé eskola refere propoin atu simu estudante hamutuk 400-resin.

Notísia Relevante:Governu suspende prosesu aprendizajen no inskrisaun ba estudante

“Kona-ba estudante foun depois ami ezame hotu ami  halo teste  ba sira no halo inskrisaun maibé alunu sira la atinje númeru ne’ebé mak ami tau depois kontinua mosu fali Estadu Emerjénsia (dasiak)tanba COVID-19, ami hapara tan eskola  no ami hateten depois de situasaun ne’e di’ak mak ami kontinua rejistrasaun filafali,” Diretora EBC Fatumeta, Filomena Caldeira Belo, ba Tatoli iha ninia servisu fatin, sesta ne’e.

Nia hateten atu responde ba ejizénsia inan-aman estudante sira-nia ne’ebé hakarak rejistu sira-nia oan iha eskola ne’ebá maka komesa kuarta to’o sesta ohin, EBC simu filafali estudante foun ho kriteria maka tenki kumpre protokolu saúde nian ba prevensaun COVID-19.

Estudante sira ne’ebé maka atu rejistu tenki uza máskara, mantein distánsia sosiál, fase liman ho sabaun, uza dezinfektan no prevene halibur estudante sira menus husi na’in 10 signifika sira mai rejistu fila kedas.

Nia haktuir tan katak estudante foun sira ne’e maihosi eskola bázika filiál Fatumeta, Bairu-Pité no mós husi Munisípiu sira.

Ezekutiva ne’e dehan mezmu simu nafatin estudante foun maibé kona-ba prosesu aprendizajen seidauk lao tanba husi parte Ministériu Edukasaun Juventude no Desportu (MEJD) seidauk hasai sirkulár atu re-ativa prosesu aprendizajen tanba foinlalais MEJD deklara ba públiku hodi suspende atividade sira iha eskola durante semana rua.

Entretantu, EBC Fatumeta daudaun ne’e iha estudante hamutuk 1.250, ne’ebé koloka ba sala hamutuk 26, no kada sala akumula estudante 45, ho profesór hamutuk 40, permanente 39 no kontratadu na’in ida, voluntáriu laiha.

“Prosesu aprendizajen iha eskola ne’e fahe ba parte dader no lokoraik,” nia hateten.

Jornalista :Felicidade Ximenes

Editór:Agapito dos Santos

HAKEREK NO HATÁN

Please enter your comment!
Please enter your name here