Diretora Jeral Prestasaun Saude Ministeriu Saude, Odete Viegas da Silva. Imajen/Jogerjo Ximenes

DILI, 16 janeiru 2021 (TATOLI)—Koordenadora Jerál COVID-19, Ministériu Saúde, Odete da Silva Viegas, hateten médiku Timoroan mane ida konfirmadu hetan moras corona virus pozitivu no daudaun ne’e izola ona iha sala izolamentu Sentru Saúde Vera-Cruz Dili.

“Pesoál Saúde mane ho idade 35, laiha simtoma ka  asintomátiku, no daudaun ne’e izola ona iha sala izolamentu,” nia hateten ba jornalista sira iha konferénsia imprensa, sábadu ne’e.

Notísia Relevante :Kazál Timoroan pozitivu COVID-19 izola iha Vera Cruz

Nia relata pasiente ne’e, hamutuk ho pesoál saúde 11 maka fó atendimentu ba  pasiente COVID-19 iha sala izolamentu Vera-Cruz Dili.

“Hahú husi loron 22 dezembru 2020 to’o iha loron 5 janeiro 2021 pesoál ne’ebé pozitivu ne’e kumpre kuarentena iha ótel Novo Horizonte,’’ nia dehan.

Pesoál saúde ne’e kumpre kuarentena obrigatóriu iha otél Novo Horizonte Metiaut hamutuk ho ema na’in 17 seluk kompostu husi pesoál saúde 12, pasajeiru ilegál na’in 4 no pesoál saúde na’in rua seluk ne’ebé iha kontaktu direta ho kazu pozitivu ne’ebé maka tula husi Aviaun Austrália tula husi Jakarta atu lori bá Austrália maibé roda koak iha Aeroportu Comoro Dili, iha loron 13 fulan-janeiru 2021.

“Pesoál hirak ne’e hahú kuarentena iha loron 5 janeiru 2021, no bainhira kompleta loron 9 nia laran ekipa vijilánsia epidemiolojia bá halo investigasaun no foti Swab teste. Amostra Swab foti iha loron 14 janeiru 2021, rezultadu pozitivu relata iha loron 15 janeiru 2021,’’ nia hateten.

Entretantu, tuir dadus ne’ebé maka fó sai husi Ministériu Saúde to’o loron 16 fulan-janeiru 2021 ne’e, komulativu teste hamutuk 17.932, hein rezultadu 279, kazu komulativu 52, rekuperadu 45+4=49, kazu foun ida, kazu baixa 7, rezultadu negative 17.601.

Totál kuarentena  obrigatóriu 93, iha Dili 26, Munisípiu 67, auto-kuarentena 84, Dili hamutuk 84, munisípiu 0, pasa ona loron 14 7.327, Dili iha 6.070, munisípiu 1.257.

Notísia Relevante :Aviaun VH-ILJ Austrália tula pasiente COVID-19 insidente iha aeroportu Comoro

Jornalista :Felicidade Ximenes

Editór:Agapito dos Santos

HAKEREK NO HATÁN

Please enter your comment!
Please enter your name here