Aviaun Austrália nian ho marka VH-ILJ .Imajen/espesial.

DILI, 13 janeiru 2021 (TATOLI)—Aviaun Austrália nian ho marka VH-ILJ ne’ebé tula pasiente pozitivu COVID-19 hosi Jakarta-Indonézia atu transporta ba Brisbane-Austrália hodi halo tratamentu maibé mosu insidente roda nakfera iha Aeroportu Internasionál Nicolau Lobato, Comoro, Tersa (12/01) tuku 17:30.

Vise Ministru Saúde Bonifácio ‘Maucoli’ dos Reis konta tuir kronolojia katak, relativamente aviaun ne’e Austrália nian no sai hosi Austrália ba tula ofisiál organizasaun ai-han mundiál (WFP) nian, ne’ebé mak sofre moras COVID -19 iha Jakarta atu transporta bá Austrália hodi halo tratamentu.

Bainhira aviaun ne’e to’o iha área Aeroportu Comoro  Timor- Leste, avtur (mina) hela uitoan, no husu ba autoridade aviasaun Timor-Leste nian hodi ense mina atu bele kontinua viajén ba Austrália.

Hafoin, hetan autorizasaun, aviaun ne’e mós tuun emerjénsia no konsege ense duni mina, maibé atu semo fali mak mosu insidente roda aviaun kuak no la konsegue viajén bá Austrália, ne’ebé oras ne’e daudaun aviaun ho nia pilotu, pasiente COVID-19 na’in ida, hamutuk ho médiku  iha hela aeroportu Comoro Dili.

”Infelizmente ami la hatene, maibé Ajénsia Nasionál Aviasaun Timor-Leste (ANATL) mak autoriza aviaun ne’e tuun atu atesta, depois sira viajén bá Austrália, maibé realidade sira atu sai hosi ne’e mosu insidente sira nia roda aviaun rabenta. Ida ne’e mak sira deskansa iha aeroportu ne’e, no hosi ne’e mak ami foin hatene informasaun katak, sira lori pasiente  COVID-19  iha aviaun laran”, Maucoli hateten ba jornalista sira iha Aeroportu Internasionál Nicolau Lobato, kuarta ne’e.

Sira ne’ebé  mak iha aviaun laran ne’e iha médiku na’in rua, pasiente COVID-19 na’in ida no pilotu na’in rua, tanba ne’e mak agora daudaun sira iha ne’e hela atu hein sira nia aviaun seluk mai atu transporta ema hirak ne’e bá Austrália.

”Ami rona informasaun hosi Austrália katak, iha ne’ebá sira nia klima ladi’ak  no aviaun seluk labele semo no oras ne’e daudaun sira nafatin iha ne’e, maibé ami hosi parte serbisu saúde iha obrigasaun haree liu ba pasiente. Ami iha solusaun ida katak, Ministériu Saúde mak atu foti, maibé tenke iha solusaun koletiva ida, tanba ita agora iha situasaun emerjénsia ida presiza envolvimentu Ministériu interiór no mós Minsitériu relevante sira seluk atu foti solusaun”, Vise Ministru Saúde esplika.

Governu Timor-Leste mós hanoin ona atu foti pasiente ne’e hodi izola iha Timor-Leste, maibé sei haree situasaun, bainhira demora maka Ministériu Saúde sei foti hodi lori ba sentru izolamentu Vera-Cruz.

”Diplomata ne’ebé hetan COVID-19 ne’e, bainhira demora liu, ami sei foti pasiente lori ba izola iha sentru izolamentu Vera -Cruz, hein to’o tempu ne’ebé  sira foti mak lori ba”, nia hateten.

Maski nune’e, Maucoli informa, ohin sira la autoriza, no hakarak prepara fatin temporáriu ida iha Aeroportu, maibé  ANATL rasik mós la autoriza, tanba ne’e mak sei hein hela desizaun.

“Tanba ne’e mak WFP ohin ami koordena malu atu buka fatin hodi mai instala fatin provizóriu, inklui sintina nune’e bele halo atendimentu ba pasiente, inklui ekipa aviaun depois ita rezolve problema ida ne’e”, governante ne’e esplika.

Entretantu, pasiente ne’e rasik ema Indonézia no hanesan mós diplomata ba Programa Aihan Mundiál nian (WFP) ne’ebé tuir loloos atu baixa iha Indoneézia, maibé ema diplomata entaun tenki lori sai ba Austrália hodi bele halo tratamentu.

Jornalista: Felicidade Ximenes

Editór: Agapito dos Santos

HAKEREK NO HATÁN

Please enter your comment!
Please enter your name here