Diretora Jeral Prestasaun Saude Ministeriu Saude, Odete Viegas da Silva. Imajen Tatoli/Antonio Goncalves

DILI, 13 janeiru 2021 (TATOLI)—Ministériu Saúde (MS), liuhosi komisaun nasionál COVID-19, transporta ona kazál timoroan ida ne’ebé pozitivu COVID-19 hosi kuaretena Batugade munisípiu Bobonaro hodi izola ona iha sala izolamentu Vera-Cruz Díli.

Koordenadora Jerál Komisaun Nasionál COVID-19, Ministériu Saúde, Odete da silva Viegas,  informa Timoroan na’in rua, la’en ho idade 48, Fen ho tinan 39, ne’e asintomátiku.

Notísia Relevante :Pasiente COVID-19 na’in haat rekupera tan

“Sira na’in rua viajén husi Tangerang, Jakarta-Indonézia iha loron 21 dezembru 2020, ho aviaun Garuda Airlines mai Kupang, toba kalan ida iha Otel Timore. Sai hosi Kupang mai Atambua iha loron 22 dezembru 2020 ho karreta rentál no hela semana ida liu iha otel Matahari. Sai hosi Atambua mai Mota’ain ho família nia karreta,” Kordenadora Jerál Komisaun Nasionál COVID-19 Ministériu Saúde Odete da silva Viegas inform aba jornalista sira iha Palásiu Sinzas, Caicoli, kuarta ne’e.

Odete hatutan, iha karreta laran kazál ne’e hamutuk tan ho ema na’in tolu konta ho motorista ne’ebé ikus mai fila bá Atambua.

“Sidadaun na’in rua ne’e tama tuir Postu UPF Badut Me’an, no Forsa UPF tula iha karreta, mai entrega iha kuarente Mota-ain,’’ Odete haktuir.

Sidadaun na’in rua ne’e mai kumpre hela kuarentena iha Motain, Batugade no ekipa vizilánsia Sentru Saúde Munisípiu  Bobonaro hasai ona sira-nia Swab test iha loron 11 janeiru 2021, ne’ebé rezultadu teste sai iha loron 12 janeiru 2021.

“Momentu ne’ebá iha pontu entrada taka, passajeiru ne’ebé hamutuk ho sidadaun pozitivu COVID-19 na’in rua ne’e iha kuarentena  Motain-Batugede hamutuk 22  no sira ne’e hotu tama liuhosi dalan illegál,’’ Odete esplika.

Kordenadora Jerál komisaun nasionál COVID-19 ne’e fó sai katak, iha mós kazu rekoperadu negativu ema na’in ida, sidadaun ne’e mane idade 43 ne’ebé tama iha sentru izolamentu iha loron  02 janeiru 2021.

“Teste dahuluk iha loron 7 fulan janeiru, rezultadu negativu no teste daruak iha loron  9 janeiru 2021 nafatin negativu. Ohin ekipa saúde sei fó alta ba sidadun ne’e,” nia subliña.

Dadus loron 13  Janeiru 2021 totál númeru teste 1.783, hein rezultadu 214,  totál komulativu kazu 51,  rekoperadu 45, aumenta  haat hamutuk 49,  kazu foun rua,  númeru baixa neen,  rezultadu negativu 17.569, tama ilegál periodu loron 31 dezembru 2020 to’o loron 12 janeiru 2021 hamutuk 22, DiLi laiha, Munisípiu 22,  totál kuarentena 93, Dili iha 27 Munisípiu 66, Auto-kuarentena 79, Dili 79, Munisípiu laiha, pasa kuarentena loron 14  7.316, Dili 6.067, Munisípiu 1.249.

Notísia Relevante :MS re-integra pasiente COVID-19 na’in-tolu ba família

Jornalista:Felicidade Ximenes

Editór: Agapito dos Santos

HAKEREK NO HATÁN

Please enter your comment!
Please enter your name here